La magia schai el detagl

Cu Lea Schmid fotografescha cun sia Canon EOS 6D Mark II, in apparat da fotografar reflex, ei praticamein nuot casual. «Jeu planiseschel mintga detagl e sai gia ordavon co la fotografia duei la finfinala veser ora», declara la dunna da 46 onns che ha senza dubi in’aveina artistica. Aschia va ella savens pils cuolms ni ella natira cun in sacados che peisa 14 kilos. Sper la merenda pachetescha ella en quel igl aparat da fotografar, sia drona, in stativ e resti da sescumiar. Tiel stil da Lea Schmid s’audan numnadamein era fotografias ch’ella ei da veser enzanua ella natira, adina davosen e cun resti lev sco per exempel rassa ed a pei blut. Quei fa ella era sch’ei ha neiv e declara: «Aschia less jeu intermediar il ruaus ora ella natira e dar als maletgs ina prisa surreala e cungir cun ina prisa humor.» Savens fetschi ella quellas cul scludider automatic e sche siu um seigi dalla partida smachi lez il nuv. Quei denton pér suenter ch’ella hagi endrizzau tut sco ella vegli.  

Quadrat

A casa elavurescha ella las fotografias e taglia tier el format quadrat ils detagls. Ils maletgs en quadrat ein sia noda casa sco las vestas extraordinarias sin detagls. Magari scuviera ella era pér duront far l’elavuraziun d’ina fotografia in detagl ch’eri buca curdaus en egl avon. «La magia schai el detagl», ei il motto da Lea Schmid e quei lessi ella era dar vinavon. Memia biars mondien tras la veta senza far stem da detagls fascinonts.  Empriu da fotografar ha ella a moda autodidacta e perfecziunau il stil duront quater onns cuors egl atelier da fotografia dalla Migros Klubschule a Turitg. «La premissa da far part da quels ateliers ei d’haver in cert level da fotografar. Nus mavan buc ora a fotografar mobein fagevan criticas da maletgs che intgin metteva a disposiziun. Quei ha purtau fetg bia a mi ed jeu hai era seschau inspirar dallas lavurs dils auters», di la fotografa. Tier siu repertori s’audan era fotografias d’architectura, da spazis bandunai, da spisas ni caussas ch’ella presenta à la «Stillleben» modern. Enqualga paran sias fotografias bunamein surrealas ed ins sto mirar bein per veser tgei ch’ellas muossan propi.

Temps interessant

Suenter igl emprendissadi mercantil ch’ella ha fatg a Trun ha Lea Schmid luvrau en plirs biros el Grischun ed ei stada miez onn ell’America. Cun 23 onns eis ella secasada a Zug e dapi lu ha Lea Schmid luvrau tier Boa Lingua. «Nus eran lu en treis. Igl ei stau in extrem interessant temps ed jeu hai astgau gidar da baghegiar si quella fatschenta che dumbra oz 100 collaboraturas e collaboraturs en pliras filialas.» Entras la pandemia eis ei denton grev per Boa Lingua ch’intermediescha segiurns linguistics en autras tiaras. La lavur cuorta, la situaziun generala, mo era l’atgna vegliadetgna ed il desideri d’ir ina via creativa han motivau l’assistenta dalla direcziun d’abdicar la plazza.

Uras da midar

Ils emprems dus meins dil 2022 vul ella far vacanzas, mo era passentar in meins sin l’insla El Hierro. Quel’insla cun turissem migeivel enconuscha la Tuatschina dallas vacanzas ed ei s’inamurada. Leu vul ella guder il temps, mo era refrestgentar il Spagnol e frequentar ina scolaziun online pertuccond il luvrar cun medias socialas. «Per mei eis ei semplamein uras da midar enzatgei ella veta ed jeu less far quei ch’jeu fetschel il pli bugen, numnadamein fotografar. Jeu sun denton realista e sai ch’jeu vegnel buc da viver da quei pil mument», conceda Lea Schmid. Ella Photobastei a Turitg ha ella gia exponiu treis ga sias fotografias. Aschia ha ella era gia survegniu enzacons jobs sco fotografa ed era astgau decorar cun sias fotografias enzacons biros.

Chez Bini

Sin Instagram secloma Lea Schmid «chezbini» ed era sia pagina d’internet porta quei num. Sco ella declara vegn quei da siu surnum «Bini» e da sia pissiun pil cuschinar ed envidar hosps a casa – pia a casa tier Bini – Chez Bini. La dunna hospitonta cuschina cun products regiunals ch’ella cumpra savens a caschun da fieras. Sia spisa preferida ein capuns, mo era pèschs ord il lag da Zug ni quel dils Quatter Cantuns  setschentan savens en sia cazzetta. Era tiel cuschinar schai il focus sil detagl ed ils hosps da Schmid gaudan las tratgas era visualmein.  Aschia capeta ei era ch’ella metta en scena in pèsch ni capuns ed auter bien. Sco in fil tgietschen attiran denton adina puspei las fotos da sesezza ella cuntrada l’attenziun dils visitaders. Tgisà co siu talent da fotografar sesvilupescha – ussa ch’ella ha finalmein temps d’intensivar il hobi preferiu?