«Mort avant 700 onns – decisiv fin oz. Dante Alighieri e sia Divina Commedia»

Settschient onns suenter la mort da ses autur inspirescha la Cumedia divina anc adina nossa fantasia. Dante Alighieri (1265–1321) unescha en sasez savida illimitada, abilitads creativas extraordinarias ed art poetic raffinà. El ha integrà temp e culturas en sia ovra, sco quasi nagins auters auturs avant e suenter. En il dialog emprovan Chasper Pult e Tatiana Crivelli d’intermediar en lur moda la particularitad da questa capodovra cun dissegnar suenter las etappas las pli impurtantas da sia concepziun, da sia structura e da sia recepziun sco er da preschentar ultra da quai perscrutadras e perscrutaders da Dante dal Grischun.

Tatiana Crivelli, naschida l’onn 1965 a Lugano, è professuressa per scienza litterara taliana a l’Universitad da Turitg. Sco directura da la retscha da cudeschs litterara da la Pro Grigioni Italiano enconuscha ella fitg bain la diversitad linguistica e culturala dal Grischun. Chasper Pult, naschì l’onn 1949 a Sent, ha lavurà sco romanist ed intermediatur cultural, tranter auter per la Pro Helvetia e sco president da la Lia Rumantscha. El ha manà il Centro Culturale Svizzero a Milaun ed è stà responsabel per il barat cultural tranter la Svizra e l’Italia. Igl arranschament ha lieu glindesdi, ils 13 da december 2021 allas 18.00 ella Biblioteca chantunala dal Grischun a Cuira. L’entrada è gratuita. I vegn giavischà da s’annunziar: info@kbg.gr.ch u tel. 081 257 28 28.