Ina lieur da tschugalata, sin Nadal?

El temps d’advent tarmettan fatschentas e privats ils auguris per las fiastas e la scumiada digl onn. Malgrad la digitalisaziun fan biars quei aunc adina a moda convenziunala, cun ina carta, tarmessa culla posta, ni schizun cun in pac. Quels auguris, pilpli cumbinai cun in engraziament, san esser ton banals sco originals. Ferton ch’ina fatschenta tarmetta alla clientella ina carta prestampada culs auguris usitai ed ina magra suttascripziun, muossa in’autra fantasia. Aschia ha il redactur dalla FMR retschiert tschei gi in pign pac cun in cuntegn veramein original: zugliau ella launa verda da pupi sesanflava ina lieur da Pastgas. Els seigien cun lur products in pass impurtont anavon al temps, scriva la fatschenta silla carta. Perquei giavischien els gia oz bialas Pastgas e surdettien perquei in schenghetg en fuorma d’ina lieur da tschugalata. L’idea nunconvenziunala ha anflau accoglientscha. Beinspert ha la lieur piars sias ureglias da fina tschugalata svizra, sco quei che la fotografia documentescha.(fmr/abc)