Success malgrà corona

L’uniun Bus Alpin è fitg cuntenta cun il resultat da fatschenta dal 2021. Quai malgrà la schlett’aura durant la stad e las restricziuns tar il manaschi pervi da plazzals da bajegiar. En sis da las 19 regiuns cun purschidas dal Bus Alpin han pudì vegnir cuntanschids resultats da record la stagiun da stad 2021.

Però en la regiun da cunfin dal Grischun cun il Tessin, la Greina/Valle di Blenio hai dà in’interrupziun dal servetsch durant trais emnas. Quai ha manà tar in minus da 41%. Sin dumonda da l’FMR ha Samuel Bernhard da l’uniun Bus Alpin declerà questa interrupziun: «Pervia da la schlett’aura a l’entschatta da la stad èsi vegni lavà davent in toc da la via da la collia­ziun da la vart tessinaisa.» Plinavant agiuntescha el: «Tar la regiun Greina datti savens grondas fluctuaziuns, oravant tut da la vart tessinaisa. Quai causa a navadas che pon vegnir fitg baud l’atun e sforzan da finir la stagiun.»

En total èn 106 500 persunas vegnidas transportadas l’onn 2021 en tut la Svizra, quai è in minus da 12% cumpareglià cun il record ord dal temp avant corona, l’onn 2019. En il Grischun è l’uniun Bus Alpin activa en tschintg regiuns: Greina, Beverin, Alp Flix, Bravuogn/Pass dal Alvra e Pany/St. Antönien. (cdm/lpd)