«Ranviias ischans er da Surses»

Igl center da biatlon cun l’arena Roland e la Tgesa Nordica a Lantsch ins canoscha aint igl frataimp aint igl cres da biatlon. L’arena totga tar egna dallas pi belas arenas da biatlon tgi dat an Europa. Siva digl 2013 on er gia li all’arena adegna puspe cursas da biatlon pi pitschnas e pi grondas. Cursas da biatlon dalla coppa «IBU» on gio gia li ed igl schaner 2020 schizont igls campiunadis mundials da biatlon digls juniors. En event tg’ò attratg en grond public e tg’è er sto decisiv tgi la «IBU», l’Uniun internaziunala da biatlon, ò surdo a Lantsch ed a Lai l’organisaziun digls campiunadis mundials da biatlon 2025. Tgi igl antier Grischun central vign a profitar dallas occurrenzas internaziunalas da biatlon tg’on li igls proxims onns a Lantsch, è realitad. Per la regiun da vacanzas da Lai è strousch pussebel da porscher cutier agl antier tross da biatlon, ad atlets ed atletas, agls trenaders ed assistents ed agls numerous fans. Biatlon totga oz tar egn digls sports igls pi populars cunzont an Germania ed an Scandinavia.

Gio profito dallas cursas da biatlon

Tgi las vals vaschignas profiteschan dallas cursas da biatlon all’arena Roland a Lantsch è indubitabel. I dovra tuttegna las dretgas persungas tgi s’angaschan persiva e tg’èn pertschertas tgi la regiun na vo per exaimpel betg angal da Savognin a Tinizong u da Savognin a Cunter. Na oz è da pansar ed er collaborar regiunal. Turisticamaintg è Surmeir ena regiun, vot deir da Beiva anfignen Lai e da Valbella anfignen Barvogn. Damai è er Lantsch, inclus las cursas internaziunalas da biatlon betg ordvart la regiun, mabagn anmez la regiun. Igl ò duvro dei anfignen tgi er igls turistichers da Surses èn stos pertscherts da chegl. Ossa è chegl pi cler cun aveir gia igls responsabels digl turissem da Surses en inscunter cun Silvio Baselgia. El segna tar l’arena da biatlon Roland per las preparativas e per l’organisaziun da tot igls events da biatlon tgi stattan igls proxims onns segl program. Menziuno seia tgi gio igl schaner 2020 on divers teams tg’èn sa patricipos agls campiunadis mundials da biatlon digls juniors gia cutier an Surses e chegl a Beiva, Sur ed a Savognin. 

«Mintga voluntari è bagnnia»

Silvio Baselgia dei tgi igls organisatours dallas cursas da biatlon a Lantsch seian fitg dependents er dallas vals vaschignas. Surses seia situo ideal, cun esser contanschibel an pac taimp davent dall’Arena da biatlon Roland. En avantatg vegia Surses er cun esser contanschibel igls deis dallas cursas sainza igl traffic grond tranter Coira, Lai e Lantsch. Silvio Baselgia è persvadia tgi dallas passa 40 naziuns vignan bleras a tschartger cutier er an Surses, er per esser en po davent digl travagl pi grond. Blers teams peglian er pi gugent cutier ainten abitaziuns, simplamaintg er cun mantger igl finanzial per star ainten en hotel. Er da chella vart saptga Surses angal profitar. «Ranviias ferm ischans alloura er digls voluntaris e gidanters da Surses», punctuescha Silvio Baselgia. I dovra mintga singul voluntari e tar las davosas cursas da biatlon seia sa musso tgi er bleras persungas da Surses seian stadas cun plascheir a Lantsch scu voluntaris. El spera ferm tgi betg angal indigens s’annunztgan scu voluntaris, mabagn er giasts da Surses. Silvio Baselgia è pertschert tgi Surses vigna a profitar er a lunga vista digls gronds events da biatlon a Lantsch. Tigls fans da biatlon seian las distanzas per eir a vurdar las cursas secundaras. Ultra da chegl vegia Surses cun la planeira da Rona er en li ideal per far passlung. I savess er esser tgi blers teams nizegian chella purscheida per trenadis libers. Igl schaner 2023 on li a Lantsch igls campiunadis europeans da biatlon ed igl december da chel onn l’amprema cursa dalla coppa mundiala da biatlon. Igl favrer 2025 segnan Lantsch e Lai alloura per l’organisaziun digls campiunadis mundials da biatlon cun mintgamai passa 20 ​000 aspectatours per cursa. Tot chels tschertgan cutier e da supponer è tgi tschertgan er an Surses.