Sumvitg: Il pei da taglia resta sin 105%

La vischnaunca da Sumvitg preveda da far igl onn vegnent in gudogn da rodund 125 000 francs. La sviulta dil quen da menaschi munta 7,7 milliuns francs. Il preventiv quenta cun amortisaziuns da bunamein in miez milliun francs. Vischinas e vischins han approbau la mesjamna sera il preventiv, era quel dallas investiziuns che quenta cun expensas da netto 3,79 milliuns francs. Vischinas e vischins ein suandai la proposta dalla suprastonza communala da laschar il pei da taglia sin 105% dalla taglia cantunala sempla. Il pei da taglia sin schischom resta – medemamein sco entochen dacheu – sin 1,3‰.

Approbau ha la radunonza communala era la revisiun parziala dalla planisaziun locala. Quella pertucca la determinaziun dils spazis d’aua, zonas da prighel, zona da protecziun per l’aua sutterrana ed il plan general d’avertura dil traffic. Medemamein ei il reglament da traffic vegnius approbaus. La radunonza communala ha approbau ils statuts dall’Uniun Nordic Surselva. Il medem mument ei la vischnaunca da Sumvitg daventada commembra da quell’uniun. Pil remplazzament dallas finiastras dall’anteriura casa da scola a Surrein ha la radunonza communala concediu in credit brut da 185 000 francs.