Al principi da sia via artistica

I’l Nairs Lab a Scuol ha gnü lö in venderdi saira l’avertüra da l’exposiziun Bilderzyklus «800 km» da Nicolas Neumeier da Scuol. L’exposiziun da sias ouvras in culuors d’aua, acril, öli e charbun es averta fin als 30 da schner.

parter

«Eu sun nat a Berlin dal 1989 e cun bap e mamma ed eir nona e bazegner eschna gnüts bler a Scuol a far passlung ed ir culs skis. Ün bel di vaina decis da far müdada a Scuol e giodair las bellezzas da quista cuntrada», ha dit Nicolas Neumeier. Davent da la seguonda classa es el i a scoula a Scuol ed imprais rumantsch. Davo la scoula populara ha el fat la matura a l’Institut Otalpin a Ftan ed imprais e lavurà sco magister. El ha fingià pitturà e disegnà da pitschen insü e la natüra illa regiun til ha animà da cuntinuar cun sia paschiun. A Berlin ha el fat ün’exposiziun privata e s’ha uossa allegrà da pudair muossar sias ouvras in ün’exposiziun a Scuol.

Minchatant es plü pac daplü

In sia laudatio ha il co-directur da NAIRS Christof Rösch fat ün’excursiun tras la vita da Nicolas Neumeier: «Neumeier es ün autodidact ed ha imprais ad inchaminar sia via sco artist sün aignas chommas. Las inspiraziuns per sias ouvras chatta el impustüt illa cuntrada da l’Engiadina, ma eir i’l chomp da tensiun tanter Scuol e Berlin, quai tradischa eir il titel da si’exposiziun. » 800 kilometers, quai es la distanza da Scuol a Berlin. «El es ün artist giuven cun curaschi chi sta al principi da sia via artistica.» Neumeier ha profità dad inscunters cun oters artists ed el es da l’avis cha sün ün tschert livel as saja dependent dad agüd da persunas dal fat. Neumeier transpuona in sias ouvras muonds da sentimaints, process visibels, evenimaints sün taila e vain impustüt influenzà da la natüra da la regiun. Cun structuras da culur, contrasts, experienzas e cun bler anim naschan sias ouvras vivas. Sco ch’el ha dit «es minchatant plü pac daplü».

Nairs Lab

Sco cuntrapunct a la chasa d’artists Fundaziun NAIRS a Scuol daja uossa eir il «Nairs Local Art Talents», dit eir Nairs Lab, chi’s rechatta illa chasa cotschna vis-à-vis da l’Hotel Belvédère sper il Stradun tras Scuol. I’l Nairs Lab muossa la Fundaziun Nairs lavuors da talents locals e lascha scuvrir al public ouvras nouvas. I’s tratta d’ün pitschen local chi pussibiltescha ad artists al principi da lur via d’art da preschantar lur ouvras. Il Nairs Lab i’l center da Scuol es ün atelier per art chi po gnir dovrà temporarmaing e chi dess animar a discussiuns davart art contemporana.


L’exposiziun in preschentscha da l’artist es averta da gövgia fin dumengia da las 17.00 fin las 19.00 ed infin ils 30 da schner