Directur Michael Roth müda tar la Repower

Michael Roth, il directur da las Ouvras Electricas d’Engiadina SA (OEE) banduna la ditta, scu cha l’interpaisa ho comunicho. Zieva 8 ans a la testa da quella s’ho el decis per üna nouva sfida. Da nouv fo l’hom da 46 ans, oriund da Soloturn, part da la direcziun da la Repower, inua ch’el cumainza il pü tard la prosma sted. El surpiglia la sparta «producziun e rait». Chi chi succeda a Michael Roth a la testa da las OEE nun es auncha cuntschaint.

Cumpletto la direcziun cun duos ulteriurs commembers

Sper Michael Roth dvainta eir Dario Castignoli nouv commember da la direcziun tar la Repower. El lavura actuelmaing illa direcziun da l’interpraisa internaziunela Nexus Energia, inua ch’el es responsabel per il management, il commerzi e las energias regenerablas. Tar la Repower surpigliaro l’hom da 46 ans, chi’d es oriund da l’Italia, la sparta «commerzi ed informatica».

Michael Roth ho 18 ans experienza illa branscha d’energia, Dario Castignoli 20 ans. Tuots duos cumainzan lur plazzas nouvas il pü tard in lügl 2022. (rtr/fmr)