Tujetsch: Sustegn finanzial per la senda dalla Neat
Il cussegl regiunal da Coop sustegn la nova senda d’aventuras dalla Neat en Val Tujetsch cun ina contribuziun da 10 000 francs. Dacuort ha il president Roberto Godenzi surdau il schec a Gelgia Deplaz, l’inizianta e presidenta dall’uniun purtadra dalla senda, Neatural. Coop sustegn adina puspei instituziuns socialas ed ovras communizeivlas. «Quei che Tujetsch ha realisau cheu ei unic. Carstgauns digl entir mund han luvrau vid la construcziun dil tunnel. Quell’ovra ha midau per adina la historia dil traffic dalla Svizra e dall’Europa. Las generaziuns vegnentas duein saver tgei engaschament tecnic, social e finanzial ch’ei staus necessaris per quella colligiaziun da viafier. Per quei motiv sustegn il cussegl regiunal da Coop quella senda d’aventuras», di Roberto Godenzi. Gelgia Deplaz puntuescha: «Per quels daners essan nus fetg engrazieivels. Quei tonpli che la tscherca da sustegns finanzials ei daventada fetg greva en quei temps da pandemia.» Il mument mauncan aunc 75 000 francs per saver cuvierer cumpleinamein la finanziaziun da quella senda da stad ch’ei era en funcziun per part igl unviern.
Gust da leger dapli?