Tutgez vous er tigl «team regals»?

Igl taimp d’advent, en taimp magic, plagn gleischs, decoraziuns e rituals, ins pudessigl pansar. Ma stress, potenzial da conflicts e mengia blera lavour è la realitad. Tot ò d’esser fitto sen la fegn digl onn. Ia va l’impressiun tg’ia sainta adegna daple la detga: «Sung ia leda, tg’ia va betg ple chel stress da cumprar regals. Nous vagn dismess chella tradiziun an famiglia.»

Nadal sainza regals? Betg cun me. E naturalmaintg sunga pertscherta tgi en pêr struban ossa igls îgls e painsan: «Ella saro ena materialistica.»

Ma per me on regals da far navot cun esser materialistic. Er ia sung dall’opiniun tgi vigna surfatg, cunzont tigls unfants. Tar las ples dallas tgombras d’unfants am crodan or igls îgls, sch’ia vei quanta roba tgi catta plaz ainten en salv. Mabagn chegl è en oter tema.

Far en regal ad ensatgi monta tg’ins vegia gugent e respectescha la persunga. Piglier peda per chella, far patratgs da tge tg’ella vess plascheir.

Cura tg’ia compr ensatge per ensatgi painsa agl sentimaint tg’igl regal duess sviglier. Forsa ènigl surstos, perchegl tg’ia va gia nudo ensatge tg’è nia menziuno durant igl onn. Ia pains agls îgls targlischonts perchegl tg’ia va catto ensatge tgi la persunga sa giavischiva, n’ò sezza pero betg cumpro.

Ia saint gio a deir igls critichers: chegl ins so er far ensacu oter. I sto betg esser adegna ena tgossa!

Naturalmaintg, ed igl rest digl onn amprova, cun otras acziuns, da mussar allas persungas tg’ia las vegia gugent e tg’ia las respectescha. Ma far eneda ad onn en regal ad els pò bagn er esser – sainza neir titulada scu persunga materialistica.

Ia va simplamaintg fadeia cura tgi «cumprar en regal e far en plascheir ad ena persunga tg’ins ò gugent» vign titulo scu en stress. Ia sung en carstgang pitost caotic e va adegna dad eir anc igls 24 da december ainten ena buteia per ensatge. Ma stress am fògl betg chegl, mabagn gl’oter. Bleras gedas sainta digl «team da nign regals, pi pac stress» la frasa:«Sast a nous ègl pi impurtant tgi seians chella seira tots ansemen, ad ena bunga tschagna. Anstagl adegna chel teater cun regals anve ed annò. Schi ia less u dovr ensatge, compra chegl mez.»

Adegna? Cura oter tgi da Nadal ins fò schiglio regals? Lez betg am dar da creir tgi chellas persungas fetschan alloura durant igl antier onn adegna puspe regals ad oters? Ia sung persvadeida tgi gist la nossa societad tgi ò adegna schi bler da far, dovra da chellas festas per far andamaint da screiver ena bela carta cun tgers pleds u en regalign da cor. Ed ea, er ia sung aint igl luxus tg’ia sa cumprar mezza tgossas tg’ia dovr u less. Ma chegl è betg cumparabel cun en regal, ena surpresa ed igls partratgs tg’en’otra persunga ò fatg davart tè.

Pertutgont igl star ansemen sunga franca, tgi a chellas persungas tgi fon regals è chegl gist schi impurtant scu agls oters. Schiglio faschessan els betg tanta lavour davant or.

Ea, las glistas èn lungas avant Nadal, ma per la mia famiglia scu er ameis vessigl tenor me adegna d’aveir plaz sen ella. Chegl è tenor me igl pi bel ve digl schintgetg. Cura tg’ia survign igls schintgetgs schi saia tgi l’otra persunga ò fatg partratgs per me. Uscheia az giaveischa en bel Nadal cun ena glista veida e l’egna u l’otra surpresa.