Da chasa en differents stils musicals

Cun tschintg onns aveva’l cumenzà a sunar il keyboard da sia sora. E cun stgatlas da chartun construì tamburs per sunar la battaria. Manuel Randi (annada 1976) è creschì si a Bulsaun en ina famiglia fitg musicala. Per ses 12avel anniversari ha’l survegnì da ses bab sia emprima ghitarra electrica. En il fratemp è Manuel Randi daventà in musicist multitalentà: El suna gist tant flamenco sco era l’uschenumnà Gipsy-Jazz, tocs da Django Reinhard u musica klezmer. Dapi l’onn 2011 è el commember dal «Herbert Pixner Project». Speratiers ha il musicist da Bulsaun però er in agen trio, il «Manuel Randi Trio». Quai maina a mes tip dad oz: Dacurt è cumparì il pli nov album da quest trio cun il titel «Illusion». Manuel Randi (ghitarras), Mario Punzi (battaria) e Marco Stagni (bass) sunan cun gronda abilitad tocs influenzads da differentas varts, sco p.ex. il toc Alban’s Bluegrass. Il disc è tut instrumental, il chant na manca però betg per giudair la musica. Ils tocs quiets sco p.ex. «La bella Addormentata» u «Per una carezza» èn musica per serrar ils egls. Il disc dal trio è a mes avis er fitg bain adattà per regalar a Nadal, sche quai nun è gia memia tard.