«Id es important d’integrar la glieud indigena»

D’instà da l’on 2017 vaiva serrà l’ultima disco a Scuol. Per la giuventüm nun existiva ingüna pussibilità plü per far parti ed ella d’eira sforzada dad ir a San Murezzan, Samignun o perfin in Austria o Italia. Cun üna petiziun ed agüd da genituors ha però ragiunt la giuventüm indigena chi gnia drivi darcheu ün club a Scuol. Il cumün ha miss a disposiziun las localitads da la disco a Trü e tscherchà fittadins. Quels han els chattà in Juliane Hieber, oriunda da la Germania, e Nicola Roner da Scuol. Cun pacs raps ed agüd da collegas vaivan ils duos giuvens tut per mans il proget, renovà las localitads e drivi in december 2017 las portas dal «Cult». D‘incuort han els dat il cuolp da partenza per lur ultima stagiun d’inviern.

«In avrigl da l’on chi vain esa per nus duos fini»

«Eu n’ha cumanzà fingià avant ün on dad ir in ün’otra direcziun. N’ha fat la maturità professiunala e less far alch in direcziun architectura», declera Nicola Roner seis motivs per la decisiun da schmetter cul club: «Avant ün mez on s’ha lura eir Juliane Hieber decisa ch’ella vöglia far alch oter. Perquai es quista stagiun nos ultim inviern aint il «Cult». In avrigl da l’on chi vain esa per nus duos fini.» Da manar uschè lönch il «Cult» nu d’eira per Juliane Hieber e Nicola Roner insomma na planisà. «Da l’on 2017 vaivna surgni dal cumün ün contrat da fittanza limità per duos ons. I d’eira previs cha’l club a Trü saja be üna soluziun provisorica», disch Nicola Roner. Davo ils prüms duos ons han els pudü però prolungar il contrat – quista jada sainza limitaziun: «Scha nus vessan vuglü vessan nus amo pudü far inavant. Uossa guardaina però cha pudain surdar il club in oters mans chi til mainan inavant.»

Comunichar per chattar soluziuns

Las localitats da la disco a Trü sun situats in vicinanza d’ün quartier d’abitar. Quai vaiva pisserà i’l passà adüna darcheu per cheus cotschens. Dal 2010 vaiva la disco – quella jada amo cuntschainta suot il nom «Sounds» – stuvü serrar sias portas. Il motiv d’eiran reclomaziuns da vaschins pervi da la canera e vandalissem. Cun quel problem d’eiran confruntats eir Juliane Hieber e Nicola Roner: «Reclomaziuns vain eir nus surgni. Üna comunicaziun averta ans d’eira però adüna importanta. Nus vain tscherchà perquai adüna il discuors cun noss giasts, ils vaschins, culla polizia e cul cumün per chattar soluziuns.» A la dumonda schi dess tenor el ün lö plü ideal per üna disco a Scuol, respuonda Nicola Roner: «Dad üna vart nu füssa dalsgüra na mal schi’s pudess far ün club in vicinanza da la staziun e davent dals quartiers d’abitar – eir perquai cha blers giuvenils dad oters cumüns vegnan aint il «Cult». Da tschella vart esa però eir important da tgnair ün pa vita in cumün.»

«Nus vain vuglü far adüna alch per minchün»

Dimena – il «Cult» es dvantà ün’istorgia da success. Nicola Roner disch: «Ils giuvenils ma eir ils creschüts vegnan gugent a nossas partis ed occurenzas.» Cha tenor el haja quai eir demuossà cha Scuol dovra ün club, cha quel gira e saja eir important per cha giuvna glieud gnia illa regiun a far vacanzas. Il «Cult» ha eir adüna sport üna vast program per giuven e vegl. D’eira quai forsa perfin lur recetta dal success? «Hai, quai d’eira dal sgüra ün important motiv», es Nicola Roner persvas e disch: «Nus vain vuglü far adüna alch per minchün.» Els han organisà perquai na be partis, dimpersè eir prelecziuns, concerts, discussiuns da podi ed oter plü.

E che tip dess Nicola Roner a seis successurs? «Chi’d es fich important dad integrar eir a la glieud indigena in uschè ün proget.» Fin ch’els surdan il «Cult» in nouvs mans dan Juliane Hieber e Nicola Ronar quist’inviern però amo plain gas in «lur» club.