Scuol: Cumbat per tickets pels gös olimpics

100 atletas ed atlets da 20 naziuns cumbattan als 8 da schner 2022 a la 5avla coppa mundiala da snowboard a Scuol per tickets pels gös olimpics a Peking. Da la partida sun eir duos indigens – il victur olimpic da l’on 2018, Nevin Galmarini, ed il talent da snowboard da Scuol, Ricarda Hauser. Quai scriva la Turissem Engiadina Scuol Samignun Val Müstair SA (TESSVM) in üna comunicaziun a las medias.

L’evenimaint stà eir suot l’insaina da la dürabilità. In collavuraziun cun «myclimate» – üna plattafuorma per la cumpensaziun da CO2 – vegn cumpensà il viadi da las atletas e dals atlets e las emissiuns chaschunadas avant e dürant las cuorsas.

Causa la pandemia ha stuvü gnir fatta l’ultima coppa mundiala da snowboard a Scuol sainza spectaturs. Pel mumaint esa previs cha las cuorsas als 8 da schner 2022 han lö – cun masüras da sgürezza – davant public. (cdm/fmr)