Cantar duront corona

La schanza ei intacta ch’il Chor d’affons Sumvitg sepresenta ils 14 e 15 da matg 2022 sco planisau agl auditori a Sumvitg a caschun da dus concerts. Da quei meini ei la coordinatura dil chor d’affons, Rita Wolf, sco quei ch’ella ha getg sin damonda. Ils affons ein meins pertuccai da restricziuns da corona. «Secapescha che nus risguardein las pretensiuns higienicas e da distanza.» La plipart dils affons che derivan dalla entira Surselva ein separticipai allas provas. E Rita Wolf quenta era che quei seigi il cass la fin da fevrer cu il chor seraduna puspei per las provas menadas dalla dirigenta Flavia Walder. «Stuschau havein nus sulet las presentaziuns stadas planisadas ellas casas da vegls e da tgira a Trun ed a Cumpadials.»

Meins optimistic

Dapli malsegirtad regia tiels chors da carschi, silmeins tier quels chors contactai dalla FMR. Isidor Cadalbert che presidiescha il Chor mischedau da Sevgein ha getg ch’il chor seigi sepresentaus da Nadal en baselgia. «Ussa fagein nus in meins pausa e lu vesan ins co la situaziun sepresenta.» Il president dil Chor mischedau da Sevgein ha menziunau la finamira dil chor da sepresentar la fin da matg alla ­fiasta federala da cant a Gossau. Tenor il president ei la gronda maioritad dallas 22 commembras e commembers dil chor vaccinada. E quei enteifer il temps pretendiu per cuntinuar cun las provas da cant. Isidor Cadalbert ha buca tralaschau da conceder che gest el sco president hagi buca schau vaccinar e sappi aschia buca separticipar allas provas. «Jeu sun per­tscharts da miu dilemma persunal e sperel sin la capientscha da tschels commembers.»

In amen peda

Ord vesta actuala ei corona buc in impediment per il Chor mischedau da Rabius da cuntinuar cun las provas sco quei che la presidenta, Doris Candinas, ha getg. «Guari ni vaccinai essan nus pli u meins tuts.» Era neu dil repertori musical ha il chor dirigius da Gabriel Derungs aunc in amen peda avon che cuntinuar cun las provas. Doris Candinas ha fatg attent al concert staus planisaus la primavera vargada cun il Chor viril da Zug. «Il concert ei bein curdaus ell’aua, il repertori preparaus per quei concert selai denton reactivar.» Planisau ha il Chor mischedau da Rabius da sepresentar ils 21 e 22 da matg ensemen cun il Chor mischedau da Surrein e cun la Societad da musica Surrein/Rabius. Schebein igl ei pusseivel da concertar communablamein la fin da matg resta pil mument aunc aviert.

Suspendiu las provas

Suspendiu las provas ha il Chor viril Lumnezia, sco quei ch’il president Daniel Blumenthal ha getg. E quei gia in temps avon Nadal. «Il concert da Nadal havein nus gia baul strihau.» Daniel Blumenthal conceda ch’il concert planisaus la fin d’avrel cun il Chor da giuvenils Grischun «penda momentan empau ell’aria». Per ademplir las pretensiuns da frenar il virus ha il Chor viril Lumnezia giu entschiet ad exercitar en gruppas. Las novas premissas ha ina part dils cantadurs denton buca pudiu ni saviu ademplir, aschia ch’il chor ei sedecidius da spustar las provas. «Nus havessan stuiu desister dils cantadurs pli giuvens e quei havein nus buca vuliu.» Sil program da cant dil Chor viril Lumnezia sesanfla era la fiasta federala da cant a Gossau e leu ei planisaus in concert cun ils dus ulteriurs gronds chors virils grischuns, il Chor viril Surses e la Ligia Grischa. La Ligia Grischa dirigida da Christoph Cajöri e tgamunada dad Aurelio Casanova ha entochen uss pudiu suandar il plan da provas. Ed il president quenta da saver cuntinuar il schaner essend che la gronda maioritad dils cantadurs po ademplir las novissimas prescripziuns da corona e cantar. Mo sco tier ils auters chors ed insumma dapertut vala era per il Chor Ligia Grischa il medem credo: Surpresas ein buca sclausas.