«Fer qualchosa per la generalited»
Grandas occurrenzas da sport drouvan üna buna organisaziun. Sper il militer e la protecziun civila giouvan voluntaris üna granda rolla tar la realisaziun da quellas. Qualchün chi’d es da la partida scu voluntari daspö ils Champiunedis mundiels da skis dal 2017 es Artur Robbi da San Murezzan. El ho piglio cun se la FMR sün ün gir in sieu bus da shuttle ed ho quinto davart da sia lavur varieda.
Artur Robbi füss gnieu pensiuno da l’an 2013 ed ho zieva auncha lavuro inavaunt fin da l’an 2015. El d’eira a la fin da sia carriera professiunela tar la pulizia da fö e d’eira respunsabel per l’Engiadin’Ota e las vals dal süd. Culs Champiunedis mundiels da skis dal 2017 as ho’l la aprüma vouta annunzcho scu voluntari. «La motivaziun d’eira quella da fer qualchosa per la generalited, da pudair güder e fer qualchosa traunter la glieud», disch Artur Robbi.
La lavur al ho plaschieu bain ed el es daspö lo da la partida tar tuot las grandas occurrenzas da sport in Engiadin’Ota.
Flexibilited e variaziun
Controlla d’ingress, controlla da las portas tar cuorsas e schofför dal bus da shuttle – las lavuors cha Artur Robbi ho già pudieu fer d’üraunt sia carriera scu voluntari sun fich variedas. Düraunt il Champiunedis mundiels dals parasportists 2021, cur ch’el ho piglio cun se la FMR sün ün gir, d’eira Artur Robbi respunsabel pel transport dals voluntaris sü Salastrains, pel transport da la pressa ed eir da VIPs.
Uschè as vaiva eir tschanteda Mikaela Shiffrin cun sieu traineder düraunt las cuorsas da coppa mundiela in december tar el aint il bus. Artur Robbi disch: «Que es adüna interessant, scha’s po discuorrer cun quista glieud. Uschè cunter nu’s vain mê ad els e tuot in üna vouta tschainta aint qualchün cha’s cugnuoscha la vusch. Que do adüna darcho pitschnas surpraisas i’l minchadi.»
La mited november 2021 d’eira Artur Robbi sülla Diavolezza a las cuorsas da da coppa europeica e respunsabel per la controlla da las portas. Lo as vaiva el eir dischluocha la spedla. 16 dis pü tard d’eira el darcho da la partida scu voluntari per las cuorsas da la coppa mundiela a San Murezzan. Artur Robbi disch: «Eau d’he adüna l’ideja sch’eau m’annunzch, alura vulessi gugent trer tres, eir per ils respunsabels chi faun quint cun me.»
Cun mauns e peis
Il contact cun glieud da tuot il muond es traunter oter eir ün motiv per Artur Robbi da’s parteciper scu voluntari. Tenor el discuorra la granda part da la glieud inglais, ma minchataunt as vain eir confrunto cun persunas chi nu discuorran insomma na inglais. In quels mumaints s’ho il voluntari eir dad exprimer cun mauns e peis. «Minchataunt d’he in quels cas da fer attenziun cha nu lasch ir la rouda da manascher. Que’s clappa ün sentimaint che chi vöglian ed alura prouvi da der üna resposta. Zieva suni eir cuntaints sch’eau prouv da’ls güder, eir scha nu’s discuorra lur lingua», disch Artur Robbi.
Scu üna famiglia
In viedi giò da Salastrains vaiva Artur Robbi dad ir a piglier üna voluntaria. In discuors cun els haun tuots duos confermo cha la lavur vain fich predscheda, saja que dals organisatuors scu eir dals atlets svess.
Els haun eir quinto, cha sur ils ans sajan adüna darcho ils listess voluntaris da la partida. Els as chattan minchataunt eir da sted per ir a tschaina u per fer qualchos’oter insembel.
«Que’s cugnuoscha la glieud e scha nu’s vain adüna a bröch cun tschertas persunas, alura as prouva dad ir our’d via a quellas. A la fin fainsa que da libra volunted e que do adüna darcho da quels, chi haun l’impreschiun dad esser il chef», disch Vroni Stoffel, la voultaria da Samedan chi’d es gnida mneda a chesa.
Ils giuvens ed ils indigens maunchan
La granda part dals voluntaris sun pensiunos e da quels vegnan bgers da la Bassa. Tenor ils voluntaris es que cler cha’ls giuvens e la glieud chi lavura nu voul sacrificher las pochas vacanzas per ir a lavurer voluntariamaing. «Eir scha que ho qualche giuvens voluntaris ans mauncha üna nouva generaziun. Que es bel cha vainsa uschè bgers chi vegnan sü an per an da la Bassa a fer da voluntari. Quel sun alura fich superbis d’esser part da las occurrenzas ed haun l’impreschiun dad esser üna part da l’Engiadina», disch Artur Robbi.
Discurrind sur dals motivs perche cha maunchan giuvens ed indigens voluntaris, nun haun ne Vroni Stoffel, ne Artur Robbi savieu der üna resposta u gieu üna soluziun. Artur Robbi managia: «Üna varianta füss da cumanzer a pajer a la glieud. Ma prüma nu’s po pajer a tuots our da motivs finanziels e seguonda nu füss la lavur pü la listessa. Eau nu’m partecipess pü scha gniss pajo», disch Artur Robbi.
Front:
In gir cun ün voluntari
Las grandas occurrenzas da sport in Engiadina nu füssan realisablas sainza il militer e la protecziun civila – ma sainza voluntaris nu gess insomma pü ünguotta. Artur Robbi da San Murezzan es ün da quels passa 300 voluntaris per occurrenza ed el ho chatto üna nouva paschiun cur ch’el s’ho annunzcho dal 2017 scu voluntari pels Champiunedis mundiels da skis. Daspö lo as ho’l partecipo a quasi minch’occurrenza pü granda scu voluntari. In connex culs Champiunedis mundiels dals parasportists in december 2021 ho’l piglio cun se la FMR sün ün gir in sieu bus da shuttle. El ho quinto davart da la motivaziun da fer quista lavur, las surpraisas i’l minchadi e las sfidas da nu savair tuot las linguas in ün ambiaint da lavur internaziunel.
Gust da leger dapli?