Novas forzas pigl pi grond cumegn

Cun la midada digl onn ò er antschet igl pensum per la nova suprastanza digl cumegn da Vaz. Nov è tgi igl taimp d’uffezi cozza pigls commembers dall’executiva digl pi grond cumegn da Surmeir (1850 votants e votantas) betg angal treis onns, mabagn quatter onns. Da nov vign chel gremi mano da Maurin Malär, el tgi ramplazza Aron Moser, tg’è sto seis onns mastral digl cumegn da Vaz. Da nov alla suprastanza fon part Beat Fausch, Kilian Margreth e Romano Paterlini. Dalla suprastanza «viglia» è angal ple resto Thomas Parpan, el tg’è nia eligia igl avost 2018 an suprastanza. Demissiuno an vista allas elecziuns communalas digl avost 2021 vevan Sascha Ginesta, siva d’esser sto seis onns commember dalla suprastanza ed Armin Margreth, el tg’era siva digl 2007 commember da chel gremi. Elisabeth Sigron-Cantieni, ella era neida eligeida igl 2010 per la suprastanza digl cumegn da Vaz.

Nign cumbat

L’emda passada è la nova suprastanza s’inscuntrada per l’amprema seduta. Scu tgi Maurin Malär, igl nov mastral ò detg vegian las sedutas da suprastanza adegna li la gievgia igl avantmezde. All’antschatta ins fetscha mintg’emda suprastanza, chegl per sa luvrar aint pi bagn. El sez vegia scumanzo bagn igl sies nov uffezi. Cun aveir a disposiziun en ferm cader, persungas cun experientscha, collaboratours e collaboratouras tgi canoschan la lavour politica ed adminsitrativa vigna la sia lavour simplifitgeida, punctuescha igl mastral da 32 onns. Chegl tgi pertotga la repartiziun digls departamaints seia sto ena tgossa fitg reala ed ansomma da nign cumbat.  I siea nia discurria avert, per part fatg midadas structuralas e sa cunvignia an pasch. Da nov magna Thomas Parpan betg ple igl departamaint d’ambiaint e sanadad, mabagn chel da biagier. Chegl tgi pertotga igl project dalla nova tgesa d’attempos e seniors Parc vign el venavant a manar, avend gio fatg an chella tgossa bunga lavour.