Zona da comfort

Igl mintgade cun unfants am porscha tot las fassettas pusseblas dalla veta, cun emoziuns scu carussels dad otg. La carezza per mies unfants è en sentimaint unic tgi dat en grond senn alla mia veta. Ia igls baratess betg, per navot sen chest mond.

Ma per deir sincer, ègl er strantg. E chi e lò reiva agls mies cunfegns cun nossas treis mattatschas. Cun davantar genitours, ins vign catapulto ainten en nov mond. En mond cun enorma responsabladad. Igls basigns da chels bagais stattan dalla dumang alla seira aint igl center, e magari er da notg. Gl’è da dar tgira, cuschinar e vurdar tgi mantga navot ad els. Vetiers vign er l’attenziun tgi els lessan dad egn, u per rachintar ni mussar. Betg da ruschanar dall’antiera organisaziun tgi dovra per metter sot tetg tot chegl tg’igl de porta. Per s’accorscher siva tgi gl’è tuttegna ia puspe ensatge scano e gl’oter ad amblidar. Sez ins vogl er en po ad amblidar e tgossas tgi eran eneda fitg impurtantas, existan betg ple. Ia va en nom per tot chegl – esser or dalla zona da comfort.

Avant, cura tg’ia era betg or dalla mia zona da comfort, saveva mianc tgi dava chella. Pertge er? Schi tot è bung, ègl gio betg da tschartger problems. Naturalmaintg veva er ligia l’egna u l’otra geda sur dalla zona da comfort. Tgi fiss racumando da bandunar chella da taimp a taimp sapientivmaintg, per crescher sur sasez or, per reuscheir ensatge, per esser curaschousa. Chels schinumnos experts e cunsigliedras vessan angal da screiver tgi seia da metter no unfants e gio ins seia or dalla zona da comfort, e chegl per en lung taimp! Curaschous, curaschous. 

Basta, ia va en recept per far chi e lò aglmanc scu sch’ia fiss puspe ainten la mia zona da comfort. Chegl è fitg simpel. Viagier an pansiers ainten chel mond da pi bod e sa simgier ensatge bel, dantant tgi las mattatschas rachintan, cloman e sa zaccan.

Gist tschel de. Egna dallas mattatschas rachintava digl curs da sa nudar dantant tgi l’otra stibgiva dad ot noms per pulieders, schibagn tgi nous na vagn nign tgavals. E la gronda veva da luvrar or cun bleras emoziuns en drama tgi era capito ainten scola. Mies om pareva dad ignorar tot chegl e rachintava tot chiet novas or d’uigl e semis da tgatscha. Chel mument vaia decidia da scappar, aglmanc an pansiers.

Ia vaseva mamez sen en’insla dallas Maledivas. Eir a nudar e bavrolar, star a suglegl, liger en codesch ainten la hamaca. Chegl fiss bel! Cun en surreir sunga turnada ainten la realitad, tschels vevan mianc s’accurschia tg’ia tarlava betg ple tiers. Ia va alloura rachinto a mias mattatschas tgi seia adegna sto en semi da me, da sgular eneda cun ellas sen las Maledivas. Chegl am seia ossa gist nia andamaint e tgi forsa fetschans chegl gio er eneda, cura tgi tottas saptgan sa nudar. Las raspostas dad ellas èn stadas zont demotivontas. La gronda am ò fatg attent segls problems d’ambiaint tgi rigian sen las Maledivas, e tgi seia da prancepi betg opportun da sgular. En punct per ella. Mia feglia da mez ò communitgia tgi ella vegia tema da sgular, tiers tgi ella ò anc mai via en aviun da davains. E la pitschna manageva tgi ella geia alloura pi gugent tar sia madretscha an vacanzas. Capasche, ia sung stada spert puspe ainten la realitad, ed or dalla zona da comfort. Ed igl semi rastaro en semi.