Ina rolla dad aur en casa cumin

Ell’emprema alzada dalla casa cumin da Tavau ei normalmein ina sculptura da fier e mésch dil designer, graficher ed artist tudestg Ernest Hofmann Igl (1920-2001). Dils 14 da schaner tochen ils 31 da mars 2022 occupa ina lavur da Marc B. Bundi quei plaz. Gl’artist ch’ei carschius si a Sagogn e che viva e lavura a Turitg muossa in object che dat en egl cul tetel «Wertewandel»: sisum ina tuor cun sis rollas cun pupi convenziunal alv ei ina rolla sularada cun aur da 24 carats.

La rolla dall’elita

«Tier quella lavur vai ei buca mo pigl object sco tal», accentuescha Marc B. Bundi. Gliendisgis han il landamma da Tavau, Philipp Wilhelm, ed el presentau l’installaziun alla publicitad. Il project d’art dueigi intimar da far ponderaziuns co la valur da caussas e material sesviluppeschi e co valurs sappien semidar. La rolla pupi da tualetta dad aur ha connex cul Forum economic mundial che era planisaus ed organisaus. La davos’jamna da schaner havessen ils pussents e l’elita dall’economia mundiala duiu s’entupar a Tavau. Il december ha Klaus Schwab e sia organisaziun denton communicau ch’ins stoppi annullar la sentupada. Il motiv evident, la pandemia, ha sfurzau leutier. Corona, Covid-19, Omikron eav. mettan sil tgau politica e societad. Sigl entir mund san ins buca pli sedustar encunter la derasaziun dallas differentas fuormas dil virus. Sco ei para ei in sistem che para pussents e ferms, falombers e rumpeivels. Valurs semidan anetgamein.

Regenzas pussentas decreteschan, il virus mutescha, svariescha e semida, sco in savun che seleischna tras la detta. Aunc avon dus onns parevi che tut seigi sut controlla e negin sappi periclitar in sistem ault tecnisau. Il december 2019 han ils visitaders d’ina exposiziun a Laax stuiu surrir d’ina installaziun che Marc B. Bundi ha presentau l’emprema gada. Ell’exposiziun da gruppa «Regiunala 19» ha el mussau ina lavur cul tetel «Valurs/Werte». Cun 1785 rollas pupi da tualetta ha el fatg ina piramida. El ha vuliu render attent als basegns existenzials humans, a damondas e perspectivas sco «Tgei ei impurtont per mei? Drov’jeu il pli niev telefonin? Gl’auto? Il material che la reclama carmala? Dus meins pli tard ha il virus mess sutsura tut – e valurs ein setransformadas anetgamein. Che Marc B. Bundi expona ussa gl’object dil mintgagi en casa cumin ha in senn ambivalent. La nova installaziun «Wertewandel» culla rolla sularada renda attent a quel.