Coray e Clopath

L’Uniun da las Rumantschas e dals Rumantschs en la Bassa (URB) envida ils 3 da favrer ad ina proxim «Inscunter interrumantsch», l’emprim da l’onn 2022. Causa las circumstanzas cun la pandemia organisescha la URB quel inscunter però a moda digitala, via l’applicaziun Zoom.

En quest inscunter vegn Johann Clopath a preschentar sia publicaziun voluminusa davart il construider da punts Richard Coray (1869–1946). Ses cudesch è cumparì il november 2021 ed è ina documentaziun dad ovra e vita da questa persunalitad extraordinaria. Numerusas punts en il Grischun, ma era en l’exteriur, han pudì vegnir construidas mo grazia las uschenumnadas «punts persas» da Richard Coray. L’autur Johann Clopath ha lavurà blers onns sco redactur e manader da redacziun tar Radiotelevisiun Svizra Rumantscha (RTR). El è oriund da la Val Schons e viva oz a Trin.