Il superstar avant Federer

Roger qua e «Rodscher» là! Sch’i va per il tennis en Svizra, lura datti atgnamain mo in super-superstar: Roger Federer. Speratiers va en emblidanza che la Svizra ha dapi passa 20 onns in’èra gloriusa en quest sport – Patty Schnyder, Stan Wawrinka, Belinda Bencic, Roger Federer etc. Ma ina sportista manca en quest’enumeraziun: Martina Hingis, la megliera giugadra da tennis insumma en Svizra. Ella ha atgnamain fullà via per tut ils auters buns giugaders da tennis, era per Roger Federer.

L’onn 1997 ha ella gì la megliera stagiun da sia carriera – en la vegliadetgna da mo 16 onns. Quests dis avant exact 25 onns aveva ella gudagnà ses emprim titel da Grand-Slam al Australian Open. E per quella raschun ha SRF mussà l’emna passada in film documentar davart Martina Hingis, davart sia vita, sia carriera, sias victorias, sias sconfittas

Mo per trair en memoria: Dal 1997 aveva Martina Hingis gudagnà suenter il Australian Open era il turnier a Wimbledon ed il US-Open. Ed al turnier da Roland Garros a Paris aveva ella cuntanschì il final. Silsuenter è ella bain restada anc incredibels quatter onns emprima en la glista mundiala da la ATP, n’ha però betg pli pudì cuntanscher la dominanza dal 1997. E surtut èsi lura stà in permanent si e giu a partir dals emprims onns 2000, cun blessuras, sconfittas, retratgas dal sport, comebacks e per finir perfin anc cun ina scumond da giugar durant dus onns causa ina prova positiva da doping (cocain) – ina disqualificaziun ch’è enfin oz dispitaivla.

Insumma, il film documentar «Martina Hingis – Leben und Karriere des Tennis-Weltstars» tira en memoria ils muments-clav da questa carriera extraordinaria. A pled vegnan las persunas ch’han accumpagnà la sportista, p.ex. sia mamma-trenadra Melanie Molitor, Roger Federer, John McEnroe ed il partenari Harry Leemann. Ma surtut mussa il film quant grev che Martina Hingis aveva da morder – gist en giuvens onns – cun squitschs ed ambiziuns da tut las varts, era da las aspectativas envers sasezza. Il film è accessibel sin tut ils chanals online e da video on demand dad SRF.