La fabrica cumainza bainbod
La Residenza Lischana a Scuol ha surgni il permiss da fabrica. In avrigl dessan cumanzar las lavuors da fabrica per 22 abitaziuns d’aigna proprietà per indigens. Per Nadal 2023 dessan tuot las glüms lura esser impizzadas.
La situaziun da l’anteriur Hotel Lischana a Scuol es daspö blers ons desastrusa. Il stabilimaint va in ruina e causa il privel cha tocs da la fatschada croudan, vegn racumandà a passants da tgnair distanza dal stabilimaint. L’anteriur Hotel Lischana fa eir ün pac bel aspet al cumanzamaint dal Stradun da Scuol.
L’on passà da stà glüschivan almain qualche glüminas la saira i’l üertin davant la gallaria dal Lischana. Quia d’eira nempe gnüda installada üna baretta provisorica per star ün pa pachific in temps da la pandemia. Quist’iniziativa es però statta provisorica, il böt dal possessur es nempe cleramaing da renovar e fabrichar oura il stabilimaint.
Avant passa desch ons vaiva l’architect Burtel Oprandi da Zernez cumprà il stabilimaint cul böt da fabrichar oura prümas e seguondas abitaziuns. La votaziun a reguard las seguondas abitaziuns til ha lura fat ün strich tras il quint. Pür dal 2019, desch ons davo l’acquist, ha l’architect e possessur inoltrà üna dumonda da fabrica cul böt da realisar üna residenza cun duos chasas cun abitaziuns per glieud plü veglia. Daspö quella jada es darcheu passada bler’aua davo l’En. Eir quist proget s’ha inquaglià: protestas, trattativas e blers adattamaints han retardà il proget.
Prümas abitaziuns d’aigna proprietà
Intant ha il possessur Burtel Oprandi surgni glüm verda ed el voul cumanzar prosmamaing cullas lavuors da fabrica. Il cumün da Scuol ha dat il permiss da fabrica per realisar la Residenza Lischana. Il proget prevezza uossa tuot in tuot 22 prümas abitaziuns d’aigna proprietà. Il stabilimaint istoric existent vain renovà cumplettamaing. In quel vegnan realisadas nouv abitaziuns da duos e mez fin tschinch e mez stanzas, cun surfatschas da 50 fin 80 meters quadrat. Sur la chasa existenta vain fabrichà ün nouv stabilimaint chi cumpiglia ulteriuras 13 abitaziuns da duos e mez fin tschinch e mez stanzas e cun surfatschas da 50 fin 150 meters quadrat.
Sco cha’l possessur Burtel Oprandi infuorma sün dumonda, vegnan tuot las abitaziuns fabrichadas cun ün standard ot, per ün predsch moderà. Da la documentaziun preschantada online, resulta plü o main ün predsch da cumprità da 10 000 francs per meter quadrat. «Tuot las abitaziuns sun eir adattadas per persunas cun impedimaints», agiundscha Oprandi e declera cha las abitaziuns sun gnüdas planisadas in collavuraziun culla Pro Infirmis. El nu discuorra plü explicitamaing d’abitaziuns per glieud attempada, dimpersè d’abitaziuns per indigens. Ils duos stabilimaints vegnan colliats ün cun tschel. Suotaint vain fabrichada üna garascha suotterrana cun plazzas da parcar per tuot las abitaziuns. Natüralmaing sun tuot las abitaziuns accessiblas cun ün ascensur.
Investiziuns da 18 milliuns francs
I’ls progets anteriurs prevezzaiva Oprandi d’integrar eir localitats per butias ed ün bistro/cafè. Quist’idea es intant gnüda sepulida. «La pandemia dal coronavirus ha muossà quant greiv chi’d es per gestiunaris ed affarists», disch Burtel Oprandi. El nu voul plü far ingüns experimaints. Dal rest manzuna’l la vicinanza a fermativas da l’auto da posta, a butias e cafès, sainza stuvair s-chaffir svessa locals per affars. Ün grond spazi d’inscunter daja invezza intuorn ils duos stabilimaints. «Ils contuorns vegnan realisats per tuots insembel», disch il possessur ed architect, chi’d ha pudü surdar d’incuort seis affar a Zernez in mans plü giuvens. «Uossa n’haja temp e plaschair da realisar quist proget a Scuol», agiundscha’l.
Il proget Residenza Lischana realisescha Burtel Oprandi insembel culla intrapraisa generala d’immobiglias Eiffage Suisse SA. In tuot vegnan investits raduond 18 milliuns francs. Las abitaziuns per indigens dessan esser prontas per Nadal 2023.
Bod 50 abitaziuns in planisaziun
Actualmaing s’ingaschan plüssas persunas, societats ed organisaziuns per promouver abitaziuns per indigens. Eir differents progets sun in trais-cha ed üna quarantina da prümas abitaziuns dessan gnir realisadas dürant il prossem temp a Scuol. Sper il proget da la Residenza Lischana cun 22 abitaziuns, sun previsas per exaimpel cul proget Raschlaina sül Stradun üna dunzaina d’abitaziuns e cul proget Prà da Bügl da la società «GS abitar» ses abitaziuns per indigens. Sco cha l’architect e societari da «GS abitar» Jon Armon Strimer quinta, dess eir la fabrica per quist proget cumanzar amo quist on. Eir oters progets plü concrets prevezzan cumbinaziuns tanter prümas e seguondas abitaziuns.
La Residenza Lischana es per intant il prüm proget actual chi giarà in fabrica. Finalmaing, as pudessa bod dir, perquai cha las ideas e trattativas sun fingià passa desch ons veglias.
Abitaziuns per indigens a Scuol
Intuorn l’anteriur Hotel Lischana a Scuol daja movimaint. Il possessur da l’areal, Burtel Oprandi, voul cumanzar a fabrichar a partir d’avrigl sia «Residenza Lischana» – cun abitaziuns d’aigna proprietà per indigens.
Daspö passa desch ons es l’architect Burtel Oprandi da Zernez in possess da l’areal intuorn l’anteriur Hotel Lischana a Scuol. E daspö desch ons daja trattativas co trar a nüz l’areal per spazi da viver. Uossa gnarà tut per mans la realisaziun d’ün proget chi dess eir dar spazi d’abitar ad indigens – ün fervent desiderat illa regiun.
Burtel Oprandi ha nempe clappà il permiss dal cumün da Scuol per realisar sia Residenza Lischana. Il stabilimaint istoric – l’anteriur hotel – vain renovà cumplettamaing. In quel vessa da dar 9 abitaziuns nouvas. Per ulteriuras 13 prümas abitaziuns d’aigna proprietà es progettà lura ün nouv stabilimaint survart.
In avrigl da quist on vessan da cumanzar las lavuors ed il possessur ed architect manaja: «Uossa n’haja temp e plaschair da realisar quist proget a Scuol». Sün Nadal 2023 vess il proget dad esser terminà, la summa d’investiziun importa raduond 18 milliuns francs. (pl/nb)
Gust da leger dapli?