«Ena plevalour per l’antiera destinaziun Val Surses»

A caschung dalla radunanza communala digls 7 da favrer 2022 cunseglia e relascha igl suveran da Surses igl project implant da sport La Nars per mangs dall’urna. I sa tracta d’ena nova infrastructura da sport a Savognin tgi cumpeglia treis plazzas da tennis e d’anviern en glatsch mobil per patinas, hockey, curling e teir a tschoccas.

En glatsch pigl proxim anviern

«Tenor la nossa constituziun ston projects da passa dus milliuns francs neir proponias alla radunanza communala e relascheas per mangs dall’urna», dei igl mastral digl cumegn da Surses, Leo Thomann. Damai, sch’igl suveran approvescha igls 13 da mars 2022 all’urna igl project da 4.5 milliuns francs, duess chel neir realiso sen la staschung d’anviern vegnenta. Igl project è nia elaboro ansemen cun las uniuns da sport e turissem indigenas. La nova infrastructura prevei sper las plazzas da tennis ed igl glatsch artifizial en magasign ed en bietg da menaschi. Chel cumpeglia er ena purscheida gastronomica e ramplazza uscheia an senn dalla qualitad e digl comfort igl restorant actual a La Nars – la tgamona da bloc – manada dalla scola da skis Savognin.

Menaschi n’è anc betg reglo

Scu tg’igl menaschi a La Nars saro reglo an futur, n’è dantant betg anc sclaria definitivmaintg. Cler è tgi la scola da skis Savognin surdaro an futur igl menaschi dalla gastronomia agl cumegn da Surses. Uscheia tgi daro ena publicaziun per dar a fit igl restorant. Pigl menaschi d’anviern digl glatsch duess neir eligia en directour e pigl menaschi dallas plazzas da tennis durant la stad ò igl club da tennis Savognin musso interess. Ins chinta cun en deficit annual da radond 80 000 francs. Per tgi chel resta minimal, on las uniuns da sport sottascretg ena decleraziun tgi reglescha igl adiever futur digl implant.

La purscheida actuala na cuntainta betg

Cun biagier igl onn 2019 la nova pendiculara Savognin-Tigignas èn crudadas davent dus plazzas da tennis ed igl glatsch natural. Restadas èn anc dus plazzas da tennis ed en glatsch artifizial provisoric a La Nars. Igls implants na cuntaintan oramai ni igls basigns digls clubs da sport, dalla populaziun ni giasts. An futur duessan er esser pussebels gis da hockey e turniers da curling e teir a tschoccas.

Schibagn igl club da tennis Savognin, igl club da curling Savognin ed igl club da hockey Ela Eagles benevaintan igls plans digl cumegn da Surses ed èn perchegl s’unias tar la IG La Nars. Cun activitads da sponsours, acziuns da collecta ed atgnas contribuziuns lessan els sa participar cun radond 380 000 francs agls costs d’investiziun. «Nous ischan digl meini, tgi las uniuns profiteschan da chel implant, e duessan perchegl er sa participar agls costs», dei Leo Thomann.

Festa d’anviern a Savognin

Per chel muteiv organisescha la IG La Nars sonda, igls 5 da favrer 2022 en de da sport a La Nars. Sper las cursas da sponsours da passlung e segl glatsch vign purschia en program sportiv per unfants e carschias. «Nous lagn mussar e promover igls differents sports. Tots on la pussebladad d’ampruar da dar a curling, a tschoccas u scliviglier sen la tor da glatsch», dei Damian Dosch, igl suprastant digl club da curling Savognin.

Er Leo Thomann saro preschaint agl de da sport: «L’investiziun cuntainta igls basigns digls noss differents clubs e promova igl sport tigls giovens. Pinavant è chegl ena plevalour per indigens e per l’antiera destinaziun Val Surses», accentuescha Leo Thomann.