Reallabor Surselva, in project

Il december vargau ha la Regiun Surselva tarmess allas 15 vischnauncas il sboz d’ina cunvegna da prestaziun cul tetel «Reallabor Surselva». Ei va per in project ch’il sviluppader regiunal Rudolf Büchi ha instradau. La Regiun metta a disposiziun alla Scol’aulta specialisada dil Grischun (SASGR) l’infrastructura per ina preschientscha fisica, el futur duei la SASGR saver menar en Surselva ina «filiala». 12 dallas 15 vischnauncas han suttascret la cunvegna. La SASGR, enconuschenta plitost culla scursaniziun tudestga FHGR, ei activa buca mo ella scolaziun e perfecziunament professiunal. Ella porscha era survetschs da perscruttaziun ed assistenza per maun public ed economia.

Survetschs per economia e societad

Dapi igl 1 da schaner 2020 ei la SASGR ina scol’aulta regiunala cun 2000 studentas e students. Ella porscha scolaziuns da bachelor e master en diversas direcziuns naven dall’architectura, inschignieria, informatica, design, multimedia tochen tiel management da sport. La scola ha en Svizra in bien num, cunzun el sectur dil turissem. Las pusseivladads praticas da sviluppar ed organisar projects en ina regiun perifera porscha situaziuns win/win. La scola culs docents e students, sco era maun public, instituziuns e fatschentas san profitar in da l’auter tras projects, studias ed expertisas.

Gest en quei connex ha il sviluppader regiunal dalla Surselva, Rudolf Büchi, lantschau il project «Reallabor Surselva» d’in post extern dalla SASGR. «Igl ei veramein in experiment. Sche quel selai realisar savein nus aunc buc», declar el. Büchi aschunta ch’in biro extern dalla scola s’occupass da damondas dall’economia e dalla societad. Il post stetti a disposiziun ad emploiai dalla SASGR sco plaz da lavur. Da cuminonza culla Regiun Surselva elaboreschi la SASGR tematicas cumplexas relevantas per la Surselva. Tgeininas che quei ei declara Rudolf Büchi aschia: «Cul Reallabor Surselva vulein nus contonscher pliras finamiras. Per exempel duei quei biro sensibilisar e promover circulaziuns regiunalas ed era iniziativas dalla digitalisaziun». Idea da basa eis ei dad esser pli damaneivel alla pratica ed allas circumstanzias localas e regiunalas. Il plaz da lavur extern da Cuera, ora ella regiun, duei dar impuls, sustener e promover innovaziuns explicit per la Surselva.

L’idea ei messa sin via

Las finamiras dall’iniziativa dil sviluppader regiunal ein resumadas en tschun puncts ella cunvegna da prestaziun. Daferton eis ei in document denter Regiun Surselva e vischnauncas. Culla partenaria SASGR seigi fixau aunc nuot, conferma Rudolf Büchi. «Dudisch vischnauncas beneventan denton quei contact ed han dau in signal positiv», declara el. Da principi vul la cunvegna «interna» definir tgi che ha da far tgei, e tgi che ha da pagar con el cass che la visiun vegn concreta. Las vischnauncas dueien purtar cuosts totals da 26’000 francs ad onn pil menaschi. Vitier vegn ina summa plafonada da 20’000 francs per occurrenzas e projects. Sco quei ch’ei para ei il project Reallabor Surselva buca ina investiziun extraordinaria. Cu quenta Rudolf Büchi ch’ins savessi arver in menaschi extern dalla SASGR ellas localitads dalla Regiun Surselva? «Nus havein mess sin meisa l’idea. Ussa drova ei aunc gl’interess, respectiv drova ei projects ed ideas, da tuts che sustegnan quei model». El savess survir ed esser d’engrau ad ina situaziun win/win.