«Quegl sara igls meas davos giois olimpics»
Par la tearza geada sapartizipescha igl Sutsilvan Jonas Baumann (31) digls giois olimpics. Igl passlunghist da Lon â passanto las davosas tres eandas a tgea par sapreparar par las cursas olimpicas a Peking – cun egna grànda fegnamira: egna medaglia an la stafeta.
Jonas Baumann (31) e sper Dario Cologna igl savund passlunghist rumàntsch ca sapartizipescha digls giois olimpics d’unviern a Peking. Suainter las olimpiadas digls 2014 a Sochi a quels digls 2018 a Pyeongchang sapartizipescha igl atlet c’e carschieu sei a Lon gea par la tearza geada da giois olimpics.
La fegnamira e egna medaglia
Jonas Baumann â absolvieu gea 12 cursas da la cupa mundiala durànt questa staschùn – cun prestaziùns admirablas: sis geadas â el termino las cursas trànter igls amprems 20. C’el e saqualifitgieu par la tearza geada pigls giois olimpics e parquegl ear betga sto egna grànda surpresa, sco c’el â getg anviers la FMR: «Jou ve musso bùnas prestaziùns. Parquegl ve jou ear quinto cun la qualificaziùn.»
Igl miglier resultat ca Jonas Baumann â cuntanschieu e sto igl seatavel post an la stafeta a caschùn digls giois olimpics digl onn 2014 a Sochi. Uon persequitescha igl atlet egn resultat ambizius: «La fegnamira da la squadra svizra e egna medaglia an la stafeta. Quegl e ear la cursa, par la quala jou saconzentresch igl ple fetg.»
Pyeongchang – an schleata regurdànza
An schleata regurdànza â Jonas Baumann igls giois olimpics digls 2018: «Jou veva ansasez egn bùn santimaint a bùns resultats antocan Nadal. Parve da motivs da sanadad ve jou musso masiravelas prestaziùns a Pyeongchang, persunalmeing egna schleat’experienztga.»
Las preparaziùns pigls giois olimpics vagnaints veza igl atlet ple optimisticameing: «Quest’eada sund jou ple ruassevel, salegr a vont cun egn bùn santimaint a Peking. Jou ve propi igl santimaint c’jou segi pront», gi el cun parschuasiùn. Sainter la sia davosa cursa a caschùn da la Tour de Ski, igls 4 da schaner 2022 an Val di Fiemme e Jonas Baumann turno a Tavo, noua c’el abitescha cun la sia famiglia. Là â igl passlunghist sapreparo pigls giois olimpics.
La famiglia e impurtànta
La famiglia – ella gioja egna rola impurtànta an la veta digl atlet sutsilvan. L’eanda passada e Jonas Baumann davanto bab par la savund’eada. Egn evenimaint ca para d’aver mido las prioritads digl passlunghist: «Quànt gî c’jou rest ànc atlet, se jou betga, dantànt par me sara’gl sirameing igls davos giois olimpics. Cun aver famiglia da dus unfànts e’gl betga ple schi sempel sco avànt diesch ons. Jou ma legr dantànt fetg digl tains ca savunda.»
Gust da leger dapli?