Igl auto electric cun dabia tensiun
Ils fabricants dad autos fan reclama, la politica promova e singuls cumpran autos cun motor electric. Quitaus fa la midada promovida dil motor da benzin ni da diesel tier la tracziun electrica als garaschists.
Tscheu e leu crodan els en egl plaunsiu, il autos cun motor electric, sulet cun motor electric sper la varianta dils aschinumnai hibrids che semuentan cun domaduas tecnologias, il motor ad explosiun sper la tracziun via motor electric.
Il cantun Grischun vala per in dils cantuns ils pli generus, quei che pertucca la taglia da traffic per vehichels cun motor electric, e las assicuranzas porschan tariffas pli bassas als possessurs dils electros.
Al meinafatschenta dalla garascha Derungs SA a Glion, Roman Derungs, eis ei buca stau tschelau ch’ils producents dad autos fan gronda reclama per la mobilitad spisgentada da battarias. E Roman Derungs ha gia vendiu ils emprems autos cun motor electric avon biabein sis onns. «Vid la tecnica dils vehichels dat ei nuot da reclamar.»
Ils electros drovan strusch servis
Quitaus fan a Roman Derungs plitost las perspectivas per igl agen menaschi e ses collaboraturs, priu il cass ch’il motor electric havess da daventar regla sin las vias grischunas. «Quels autos drovan strusch servis ed aschia va dabia lavur a piarder.» La tensiun electronica dils vehichels cun grondas battarias pretendan mesiras da segirtad per ils collaboraturs dallas garaschas. Quei per impedir fridas electricas che san esser mortalas.
Ei dat denton auters aspects che plaidan tenor Roman Derungs buc exnum per la varianta cun in motor electric. «Sch’ins fa gia ussa quitaus pervia dil provediment cun current, sedumondel jeu tgei che schabegia, sch’in grond diember dad autos penda in gi vid la reit per cargar las battarias.» Ed ina auter tema aunc adina buca sligiaus a moda cuntenteivla tenor il meini dil garaschists ei tgei far cun las battarias veglias.
Drova capientscha per l’electronica
Aldo Beeli, possessur e meinagestiun dalla garascha Beeli SA a Glion ha vendiu avon in onn siu emprem auto electric. In auto ch’el valetescha buc exnum per vehichel per in e scadin. «Ei drova ina certa capientscha per la tecnologia electronica per manischar in tal vehichel.» Ed ins sto parter en las forzas dalla battaria, pertgei prender neunavon il canister da reserva sch’il tanc, respectivamein la battaria ei vita ei buca pli pusseivel. Ils vehichels cun motor electric valan per computers sin quater rodas. «Per part ei quei gia uss il cass tiels autos cun motors ordinaris.»
Aldo Beeli ha fatg attent ch’ils autos cun motor electric ein colligiai cun igl internet e che la dependenza tiels producents dils autos crescha. «Va in tal auto buc, drova ei las informaziuns d’ordvart daco ch’il vehichel va buc.» Entochen otg onns concedan ils producents dad autos ina garanzia per las battarias. «Remplazzar quellas va els daners, malgrad che la tecnica da battarias lubescha da remplazzar sulet parts digl arcun d’energia.»
Il possessur dalla garascha Beeli ha aunc menziunau in problem general che pertucca l’entira digitalisaziun: «Sch’ei dat enzanua ina persuna habla da bloccar via internet il sistem electronic da quels autos, vegn quei baul ni tard a schabegiar.»
Ina nova libertad
Cornelia Coray posseda gia dapi treis onn in auto electric ed ella ei fetg cuntenta cun quei vehichel. Quei ei igl auto ch’ella drova principalmein da carrar da Ruschein a Glion alla lavur e per serender el Tessin sin la plazza da campar. «Igl auto ei fetg ruasseivels ed ins sto dar adatg da buca carrar memia spert.» Cun las battarias emplenidas fa Cornelia Coray duront la stad 300 kilometers e duront igl unviern gest aunc la mesadad. Temperaturas bassas limiteschan la forza dalla battaria. Cornelia Coray: «Jeu sun sapientivamein sedecidida da desister ton sco pusseivel da memia bia electronica egl auto.» Ch’igl ei magari bien da planisar in viadi respectivamain ils stops da cargar las battarias han Cornelia e siu um fatg stem sin in viadi tras la Svizra. «Gest ella Svizra franzosa ein ils loghens da cargar meins frequents.» E cargar cuozza in bienton pli gitg che tancar. «Sin viadi ston ins cumbinar il cargar cun ina pausa da caffè.» Per regla carga Cornelia Coray siu auto, respectivamein las battarias, a casa e colligia il vehichel cun igl agen indrez solar sin tetg casa. Quei cuozza bein in pèr uras e pretenda dalla manischunza da coordinar cargar cun luvrar e dar sulegl. «Jeu sesentel buca restrenschida, per mei ei quei ina nova libertad ed independenza.»
Gust da leger dapli?