«I vegn daplü glieud co l’on passà»
Daspö il december 2020 prepara Peider Andri Toutsch sün aigna iniziativa üna loipa da passlung a Buffalora. La FMR vaiva avant ün on discurri cun el davart sia motivaziun e seis plans per quella loipa. Ma co va la stagiun infin uossa e chenün da quels plans ha’l intant pudü realisar?
Fin avant ün pêr ons preparaiva il cumün da Zernez üna loipa sü Buffalora chi’s rechatta sün 1968 m s.m. e chi’d es ün dals lös ils plü fraids in Svizra. Davo cha quella loipa nu gniva daspö divers ons plü gestida dal cumün, ha Peider Andri Toutsch, il schef da l’Hotel Süsom-Givè, svess surtut l’iniziativa. Daspö december 2020 prepara’l sün agen quint üna sporta per passlunghistas e passlunghists, ma eir per persunas chi vöglian simplamaing ir a spass. La FMR til vaiva visità avant ün on e discurri cun el davart sia motivaziun da far quella loipa e seis plans pel futur ed ingon sco cha la situaziun as preschainta uossa.
Prolungà la loipa
«Id ha ün toc damain naiv co l’on passà» disch Peider Andri Toutsch, «ma a las fins d’eivna d’eira intant per furtüna per gronda part bell’ora. Uschè chi ha gnü adüna ün pa glieud sülla loipa.» Uschè il bilantsch da l’hotelier pels prüms mais da la stagiun. Ils stizis fa’l adüna amo cun seis quad cun tachà landervi ün splattütschader. Ils prüms girs cun quel quad sülla planüra da Buffalora ha Peider Andri Toutsch fat a la fin da november: «Üna gruppa da passlunghists da la Val Müstair am vaiva contactà e dumandà sch’eu pudess preparar per els la loipa.» Il traget cun stizis per far passlung classic e skating s’extenda darcheu suot l’Alp Buffalora. Peider Andri Toutsch ha però agiunt quist on ün latsch implü ed uschè prolungà sia loipa per ün pêr tschient meters. Scha las cundiziuns da naiv restan sco fin uossa fa l’hotelier quint da pudair preparar la lopia fin Pasqua.
«Eu n’ha schon avant da far quai amo ün pêr ons»
Sco cha Peider Andri Toutsch ha quintà l’on passà a la FMR, vaiva’l surgni dal Cumün da Val Müstair be ün permiss provisoric per far la loipa a Buffalora. Seis giavüsch da quella jada d’eira però da surgnir in avegnir ün permiss permanent: «Per dar a mai ün permiss permanent stuvess il cumün adattar il plan da zonas, voul dir metter il plan da Buffalora illa zona da sport.» Cun quai cha’l cumün nu vöglia far quai, uschè il hotelier invers la FMR, haja’l dimena eir quist on surgni be ün permiss provisoric. El disch però plünavant, cha‘l cumün til haja garanti ch’el possa prolungar quel permiss minch‘on ed uschè eir in avegnir gestir sia loipa. «Schi, eu n’ha schon avant da far quai amo ün pêr ons», respuonda Peider Andri Toutsch a la dumonda scha quai saja insomma si’intenziun.
«Alch vegn adüna darcheu miss aint»
Ün da seis plans da l’on passà, nempe quel da spordscher insembel cun oters partenaris ad atletas ed atlets da cundiziun la pussibilità da far trenamaints d’otezza, nun ha Peider Andri Toutsch amo pudü realisar. Oter guarda però oura cun seis intent dad offrir pussibilitats da trenamaint per glieud chi van cun chans da schlitra: «In schner es stat quia ün pêrin per trenar cun lur chans sül traget. In Svizra existan fich pacas da quellas pussibilitats da trenamaint», uschè Peider Andri Toutsch. Sia spranza es perquai adüna amo da gnir sustgnü dal cumün e dad organisaziuns turisticas per metter ad ir üna tala sporta.
Eir sch’el nun ha intant pudü realisar tuot seis plans sco giavüschà e fa eir amo tuot la lavur sün agen quint, es Peider Andri Toutsch cuntaint: «Eu bad ch’in cunfrunt cun l’on passà cugnuoscha daplü glieud la loipa e vain perquai sü Buffalora. Eu survegn be resuns positivs.» La chaschina per dar üna cuntribuziun per sia lavur as rechatta adüna amo pro’l restaurant. «Alch vegn adüna darcheu miss aint», constata l’hotelier cun ün surrier.
Gust da leger dapli?