Sang da Surava

parter

Marde seira ò l’Uniun da samaritans Belfort organiso ansemen cugl sarvetsch da donaziun da sang Grischun ena seira da donaziun da sang. La FMR ò accumpagnea l’occurrenza.

«Gea, chest’eda vagn nous gia en po en’otra organisaziun perveia da corona», dei Jsabelle Casutt, la presidenta dall’Uniun da samaritans Surava. La donaziun ò bagn anc gia li ainten la tgesa da scola da Surava, pero igl proceder è sto oter cugl concept da schurmetg da corona. «Tot è sto organiso scu veia unilaterala. L’antrada ainten la sala da gimnastica è stada giusot, lò èn nias controllos igls attests, ed ena media è stada pronta per far en check da chels tgi fon l’amprema geda ena donaziun, siva ins ò stuia eir anavant tras en pierta, lò è neida controllada la pressiun da sang, e siva da stgela se ainten la sala da gimnastica», dei Jsabelle Casutt. Ainten la sala da gimnastica on alloura gia li las donaziuns.

Donaziuns da sang aint igl antier Grischun

Pertge tgi la donaziun ò gist gia li a Surava, declera Sonja Heer, la responsabla digl sarvetsch da donaziun da sang Grischun: «Nous vagn siva dad onns ena bunga collaboraziun cugls noss partenaris ainten las regiuns. Nous vurdagn da curveir igl antier cantun e giagn per exaimpel er ainten la Bergiaglia u ainten la Nagiadegna.»

Dattigl alloura actualmaintg mengia pac sang aint igl Grischun? «Na, igl mument ègl puspe migler e nous nign gist tras cun las reservas. Nous vagn pero antras igls blers cass da corona igl davos taimp naturalmaintg er gia pi pac donatours e donatouras, perchegl tgi chels on stuia star a tgesa» dei Sonja Heer anvers la FMR. La contribuziun da Radiotelevisiun Svizra Rumantscha digl schaner vegia er gido da reactivar puspe donatouras e donatours (remartga redacziunala, RTR ò fatg igls 14 da schaner ena contribuziun cugl tetel: «Reservas da sang èn sen en livel critic»).

La seira a Surava – en success

A Surava èn neidas chella seira 63 persungas ainten la sala da gimnastica. Chegl èn circa madem bleras e blers scu las davosas gedas. Las persungas tg’èn rivadas èn neidas guidadas digl persunal curtaschevel tras las differentas staziuns per dar sang. Perveia da corona ègl pero er sto a fegn siva la donaziun.

Commentar

Dar l’amprema geda sang

Dar sang – chegl vaia surlaschea anfignen ossa agls oters. Pertge na saia atgnamaintg betg, betg peda, betg gost, tge er adegna. Siva tg’ia va pero ligia eneda ainten las medias tgi las reservas da sang seian sen en livel critic vaia panso: «Giagn se Surava a dar sang!»

«Bever simplamaintg avonda avant la donaziun», am ò detg la presidenta digls samaritans Belfort, Jsabelle Casutt. Detg e fatg, avant la donaziun vaia bavia ava minerala scu ena vatga.

Arrivo ainten la bela vischnanca da Surava, vaia gio vasia la sala da gimnastica illuminada e blers samaritans tgi faschevan las davosas preparaziuns per la donaziun. En po nervous sunga alloura tuttegna nia. «Ma hey, chegl surveivas te schon!», vaia detg a mamez.

Cunchegl tg’ia sung ia l’amprema geda a dar sang, vaia gia d’amplaneir en formular cun dumondas scu: «Hatten Sie in den letzten 4 Wochen einen Zeckenstich» u bagn alloura «Haben Sie seit dem 1.1.1980 eine Bluttransfusion erhalten». «Nein», «Nein», «Nein». Ia va fatg las fitg bleras crouschs «Nein» segl palpieri e sung alloura ia tar la media preschainta, tgi ò controllo las mias crouschs e vurdo scu tgi stetta cun la mia pressiun ed igl mies puls.

Ok, anfignen ossa è tot an urden. Ia dastg dar sang e vign anavant, se ainten la herziga sala da gimnastica da Surava, noua tgi ia vei gio blers tgi schean sen letgs improvisos ve da dar sang.

Scu proxim ò ena tgera donna am fatg en piks aint igl det, per vurdar scu tgi stetta cun la mia valour digl hemoglobin ed er per vurdar tge gruppa da sang tgi ia vegia. Tot ok cugl hemoglobin, gruppa da sang A, Rhesus positiv, digl reminent: scu circa 37 pertschent dalla populaziun. Basta. Perchegl tgi ia na va anc mai do sang sunga nia categoriso scu «Erstspender» e va perchegl survagnia ena bunga lugargia da fraias, juhuii!

Ossa vigna guido sen egna dallas pritschas ed a me vign declaro bagn e cun gronda pazienztga tge tgi capeta: «Nous pigliagn circa en mez liter sang da tè». E zac, penda ve dad ena sprezza ed igl mies sang corra or digl mies bratsch ainten en satget da plastic. Mal na fò chegl betg, ossa ègl pero nom da spitgier circa 10 minutas e vurdar segl plafung dalla sala e segl canaster da basketball – anfignen tgi è sang avonda aint igl satg. Cun marveglias varda schi igl mies sang è forsa blo, blo scu chels dall’aristocrazia, ma igl n’è betg igl cass… Fò er navot. Adegna puspe vign sperasve ena samaritana e varda bagn schi tot seia an urden cun me. Tutto a posto, dar sang è veiramaintg nign cunscht. Cun grond gost ed igl sentimaint dad aveir fatg ensatge bung vigna pigl mies sandwich da schambung e la mia schorle, tgi mintgign survign scu angraztgamaint aint igl local cun reck e bara e matrazas da gimnastica. Igl è ossa numnadamaintg puspe nom: bever avonda, per angulivar la perdita da liquid. Graztga fitg a tot chels tgi am on accumpagnea! Adia Surava.


La proxima pussebladad da dar sang an Surmeir è igls 15 da zarcladour a Savognin. Daple infurmaziuns e termins da dar sang, www.blutspende-gr.ch