La Corporaziun d’aua Las Fontaunas ei historia
La Corporaziun d’aua Las Fontaunas ei stada duront biars decennis responsabla per il provediment d’aua da Mumpé Medel. La sonda vargada ha ella salvau sia davosa radunonza generala. La corporaziun ha surdau sia incarica en auters mauns.
Duront 32 onns ha Leo Simonet presidiau la Corporaziun d’aua Las Fontaunas da Mumpé Medel. La sonda vargada ha el menau per la davosa ga la radunonza generala. La corporaziun ha buca giu d’eleger ina successura ni in successur. Ella ei vegnida sligiada la sonda vargada cunquei ch’ella ha surdau il provediment d’aua dil vischinadi da Mumpé Medel sin l’entschatta digl onn 2022 alla Corporaziun d’aua Spina da vin, la corporaziun ch’ei responsabla per igl entir provediment d’aua dalla vischnaunca da Mustér. Varga treis decennis alla testa dad ina corporaziun demuossa dabia voluntad da s’engaschar per la publicitad. «Nus cheu a Mumpé Medel essan ina pintga cuminonza, aschia che las incaricas publicas ein stadas repartgidas sin paucas schuialas.»
Cuntents da saver calar
Leo Simonet ei satisfatgs da saver surdar ina infrastructura intacta alla Corporaziun Spina da vin. «Nus havein investau varga dus milliuns francs ils davos onns en aquaducts, reservuars e fontaunas.» Sedecidida da calar ei la corporaziun da Mumpé Medel era pervia dallas pretensiuns e prescripziuns creschentas visavi al provediment d’aua. «Ei maunca era nova glieud promta da surprender responsabladad ed uffeci.» La suprastonza dalla Corporaziun d’aua Las Fontaunas che secumpona, sper il president, dil cassier Wendelin Jacomet ed digl actuar Bruno Manetsch ha presentau e schau approbar la sonda vargada ils presents en La Scursalada a Mumpé Medel il davos quen dalla corporaziun. «Ina facultad havein nus buca giu da reparter.» Leo Simonet explichescha che la Corporaziun d’aua Spina da vin stoppi surprender in deivet da 160 000 francs. «Quei ei denton ina mudesta summa visavi l’infrastructura intacta ch’els san surprender.»
Vivian ha interrut igl aquaduct
Denter 35 e 40 edifecis retrain l’aua dalla corporaziun d’aua da Mumpé Medel. «Dalla valur dall’aua ein ins pér per-tscharts, sch’ella flessegia buca.» E quei ei succediu il fevrer 1990 cu igl orcan Vivian ha bess igl uaul a tiara e donnegiau igl aquaduct da Mumpé Medel. «Duront 10 gis ei nies aquaduct staus interruts.» Sco quei che Leo Simonet di han ins stuiu carrar neutier l’aua da diever per habitonts ed animals. Igl orcan sco er il provediment d’aua da Mumpé Medel ve-gnan era menziunai ell’ovra da Gion Battesta Manetsch. Dapi 17 onns ei Gion Battesta Manetsch sils calcogns alla historia da Mumpé Medel ed el decuors digl onn 2022 quenta il cronist local da presentar sia ovra. Il tiarms principals dalla historia dil provediment d’aua da Mumpé Medel ha Gion Battesta Manetsch tradiu alla FMR. Para era l’aua adina plitost scarta egl anteriur uclaun gualser da Mustér sco quei ch’il cronist tradescha neu da sias retschercas.
Cun daners emprestai da privats
Las empremas stentas da menar neutier aua el vitg ein documentadas igl onn 1889. Demai che las bancas han buca vuliu finanziar igl emprem aquaduct han ils da Mumpé Medel stuiu empristar daners da privats. Igl aquaduct para dad esser secumprovaus pertgei gia igl onn 1907 ha il vischinadi lubiu da menar aua en casa. Ina pli gronda investiziun el provediment e novas fontaunas han ins fatg ils onns 40 dil tschentaner vargau. Pervia dalla uiara mundiala ed ils umens sils cunfins ein ils cuosts carschi in bien ton sur il preventiv. Igl onn 1942 ei la Corporaziun d’aua Las Fontaunas vegnida fundada e ha surpriu il provediment da Mumpé Medel. E ha continuadamein investau, engrondiu e manteniu ina ovra sur decennis. «La suprastonza dalla corporaziun ha mai retratg ina paga per sia lavur.» Dapli detagls dall’aua da Mumpé Medel e da l’entira historia digl uclaun vegn Gion Battesta Manetsch a presentar en sia cronica, pil mument aunc arcunada en siu computer. Ton selai gia ussa tradir, era in pign uclaun posseda ina historia reha ed interessanta.
Gust da leger dapli?