«Bainvgnü a Sent – cumün da cultura»
La Pro Senectute da Sent ha invidà in venderdi passà a senioras e seniors illa sala cumünala a Sent ad ün referat da Paul Eugen Grimm davart seis cudesch da Sent.
Chatrina Ritzmann, la manadra da la Pro Senectute da Sent ha pudü salüdar üna quarantina da senioras e seniors da Sent, Scuol e Tarasp al referat da Paul Eugen Grimm. «Daspö duos ons esa stat pervia da corona plütost quiet – ed uossa es il temp darcheu madür per organisar arrandschamaints per inrichir la sporta. Eu less ingraziar a sar Grimm ch’el metta a disposiziun seis temp prezius per quintar davart sias retscherchas da nos cumün.»
A Paul Eugen Grimm ha dat in ögl a l’entrada da Sent dasper la via üna tabla cun l’indicaziun «Bainvgnü a Sent, cumün da cultura». As referind a quella ha dit il referent: «L’istorgia da Sent es ün tema uschè grond e vast chi nun es pussibel da dar ün riassunt da quella dürant ün’ura. Perquai n’haja decis da dar ün’invista cun ün pêr puncts chi paran a mai importants.»
Sent cunfina cun l’Italia e cun l’Austria
In ün documaint dal 930 vain manzunà il cumün cul nom Vicus Sindes, plü tard sco Sins. Grimm ha muossà üna marca postala cul titel Sins e daspö l’on 1879 es il nom dal cumün Sent. «Bod unic in tuot la Svizra es cha’l cumün da Sent ha duos pajais esters sco vaschins, i’l nord-vest es quai l’Austria, vers südost l’Italia. Quai vala s’inclegia actualmaing eir pel cumün fusiunà da Scuol.»
Üna persuna importanta per Sent es stat tenor il referent Richard Capadrutt. El es gnü dal Heinzenberg a Sent sco magister ed ha eir surtut caricas politicas, sco mastral, güdisch, cumandant dal circul ed oter plü. Sco cha Paul Eugen Grimm ha dit: «Ün hom important na be per Sent, ma eir per tuot l’Engiadina. Perquai ha concess il cumün da Sent a Richard Capadrutt ed a sia famiglia il vaschinadi.»
In üna seguonda part dal referat ha Grimm muossà diversas fotografias da la cuntrada da Sent ed ils preschaints han pudü ingiavinar ingio cha quellas sun gnüdas fattas.
La ruina San Peder a l’entrada da Sent
A l’entrada da Sent, nan da Scuol, as vezza la ruina da la baselgia San Peder, fabrichada il 12avel tschientiner da la famiglia dals signurs da Sent. Daspera s’haja chattà restanzas d’üna tuor chi d’eira probabelmaing la dmura da la famiglia. «Il possessur da la baselgia d’eira Peder Lansel chi ha organisà perscrutaziuns intuorn quella chi han lura cumprovà l’existenza da la tuor.»
Paul Eugen Grimm ha lura manzunà divers oters noms da persunas chi han buollà l’istorgia da Sent, tanter oter Andrea Vital, Töna Schmid, Oscar Peer, Gottfried Honegger, Jon Stalvies, Peder Lansel, Not Vital ed oters plü.
Davo la part uffiziala ha la Pro Senectute sport – sco adüna – eir tuorta e cafè. Ed ils preschaints han pudü star amo ün mumaint da cumpagnia.
Gust da leger dapli?