Chantinadas da La Triada
Ellas ein sepresentadas avon il publicum da casa il venderdis vargau a Glion. Las treis cantauturas da La Triada han regalau als presents bunas novas ed in’ura legreivla cun lur cant.
Corin Curschellas ei responsabla pil slonsch dallas producziuns, Astrid Alexandre procura per la melancolia e conta bugen melodias en mol, Ursina Giger stat el miez digl ensemble e tegn igl equiliber ton en muments d’agitaziun sco era cun ulivar las vuschs ellas canzuns dalla producziun. Ina rolla specifica individuala ei denton buca da percorscher e surdar mo ad ina cantadura, auter quella d’intunar las canzuns, gliez ei caussa d’Astrid Alexandre. La clav da cantar dat ella buc ord maun.
Chantinadas – tut a cantond
El pign spazi dil Cinema sil plaz a Glion ei tut stau original. Negins instruments e cunzun negins mieds electronics. Spontan e cun libra interpretaziun han las treis cantaduras demussau lur talents cantics. Litteratura populara en romontsch descriva ils destins. Legria e tristezia ein maneivlas als sentiments, pertgei las situaziuns da mintga carstgaun ein individualas e san semidar spontan. Quei resplenda la tonalitad dallas canzuns. La midada denter mol e dur ei in fenomen d’anflar savens en canzuns romontschas. Popular ei pils romontschs buca mo legria e hilarica. Tristezia, partenza e sperdita vegnan tematisadas ambivalent en canzuns.La Triada ha discuvretg ils differents destins en canzuns ord tuttas regiuns da nies cantun e spazi romontsch. Igl um da Müstair, la giuvna da Sogn Murezi, il cusunz che va a mattauns a Segnas. «Bunas novas» ei il tema dalla canzun d’entrada. Corin Curschellas sa che quellas ein raras el temps actual. Il cant duei purtar speronza e la cardientscha per in meglier avegnir. Era las veglias canzuns han in connex cul temps dad oz. «Virola, virola» tematisescha malsogna e pretenda che quella mazzi affons. La mumma che pretenda dil general da dar anavos siu fegl schuldau. Ella survegn la replica «el sto per tia patria la veta schar». Variaziun ella veta dil vitg da pli baul purtavan ils cuntscha-cazzettas. Ella canzun «Il Toni da Strada ei cheu el quatier» vegn la caussa tematisada. La canera ed il cunfar entuorn il parler vegn visualisaus e cantaus cun slontsch e cun percussiun vocala dallas cantaduras. Ils «rumpa-rumpa, teta-trè» marcan las canzuns da tscheiver ed il plum dalla buis ei d’udir ella canzun dalla lieur che fui dil catschadur.
L’amur ella canzun populara
Il tema dall’amur ei in fil tgietschen atras la canzun populara. Quei ei tiels Romontschs buca auter che en autras societads e las producziuns da La Triada filan quei fil vinavon. Morel, il giuven engiadines che s’avischina a sia cara en combra e vegn tochen davos la pegna, mo la mumma fa guardia ed impedescha il happy end. Il mat lumnezian camina da Duin tochen en Val e Vrin per anflar quella ch’el giavischa. Leu a Vrin ei siu maraton a fin ed el anfla ina che plai. La giuvna fa la gliesta «duei jeu – duei jeu buc» e vegn tiel resultat «ei fuss schon bi da haver in bi um sch’els fussen bu canagls».
Corin, Astrid ed Ursina ein cantaduras solistas, mo uneschan communablamein in bi cant, unificaus sin quei trio. In interessant project presentan ellas sin lur pagina www.latriada.ch. Tgi che segna in abonnament da «Chantinadas» per canzuns popularas romontschas survegn mintga meins ina nova canzun. En tut presentan ellas 24 canzuns buca sulet cun cant, mobein las notas, il text ed in cuort commentari ein cumpigliai el «download». Dapli dalla canzun populara romontscha cuntegnan ils toms «La Grischa». Quels ha Corin Curschellas ediu e tier la cumpra dils cudischs ein las canzuns era d’udir sil disc cumpact integraus el cudisch (www.corin.ch). Dapi diesch onns contan las treis dunnas canzuns popularas romontschas cungidas cun elements musicals moderns. Moviment, accumpignament e variaziun melodiusa dattan al cant dil vargau nova veta. Lur finamira eis ei da puspei reanimar il cant romontsch tier giuven e vegl.
Gust da leger dapli?