La rolla sularada da Tavau

parter

Marc B. Bundi, carschius si a Sagogn e sesents a Turitg, ei dapresent a Paris sco stipendiant ella Cité internationale des arts. El center dalla metropola europeica, el quatier Marais, ha el caschun da sviluppar sia creativitad e seformar artisticamein. Cuort avon che la pandemia entscheivi haveva el mussau in’installaziun ella Cularta a Laax. La piramda da 1785 rollas da pupi da tualetta han evocau bia attenziun. Sin quei ha el mussau ina secunda piramida ella galleria Obertor a Cuera. Gliez object da 2.10 meters altezia cun 2024 rollas ha giu in effect medial extraordinari. Finamira da Marc B. Bundi eis ei da metter en damonda ina societad che consumescha e dismetta senza ponderar. Las installaziuns cul tetel «valurs» dueigien animar da midar la perspectiva. La lavur artistica culla piramida sebasa silla piramida dils basegns dil psicolog american Abraham Maslow. In’installaziun actuala digl artist sursilvan tier la medema tematica ei exponida ella casa cumin a Tavau. Igl ei buca ina piramida, mobein ina suletta rolla pupi da tualetta – il pupi ei sularaus. L’installaziun provoconta ei exponida tochen la fin matg. Duront il Forum economic mundial ch’ei puspei a Tavau dils 22 tochen ils 26 da matg 2022 han ils indigens e hosps da Tavau, ed era ils pussents dil mund, caschun d’admirar ella.(fmr/abc)