Flem sco bun exaimpel per promover abitaziuns per indigens
La società Anna Florin e la Fundaziun Terrafina Engiadin’Ota sensibiliseschan regularmaing pella regulaziun da seguondas abitaziuns e la promoziun da spazi d’abitar per indigens. Per exaimpel cun preschantar il model Flem a Scuol ed a Samedan.
La società Anna Florin e la Fundaziun Terrafina Engiadin’Ota han invidà a duos arrandschamaints cun discussiun davart ledschas cumünalas per prümas abitaziuns a Scuol ed a Samedan. Il böt da quistas occurrenzas d’eira d’intimar la discussiun a man da l’exaimpel dal cumün da Flem. La giurista dal cumün da Flem, Corina Caluori, ha preschantà tuottas duos sairas la soluziun da Flem per promouver il spazi da viver per indigens. Il model da Flem es gnü acceptà da la populaziun e dal Chantun e vala, sco cha la referenta ha infuormà, sco bun exaimpel per üna revisiun curaschusa da la planisaziun locala. Intant cha l’interess pella tematica es stat a Scuol magari pitschen, han visità in mardi saira passa 60 persunas l’arrandschamaint a Samedan. Riet Fanzun sco president da la società Anna Florin es cuntaint culla partecipaziun impustüt a Samedan. Ad el esa consciaint, cha l’arrandschamaint a Scuol ha forsa gnü lö al mumaint sbaglià, cun quai cha la prüma procedura da cooperaziun da la revisiun da la planisaziun locala da Scuol es terminada als 31 d’october e la populaziun haja forsa per intant gnü avuonda da la tematica. «La tematica resta actuala, adonta dal stadi da la revisiun da la planisaziun locala da Scuol, e nus vain organisà l’arrandschamaint per tuot la populaziun da l’Engiadina Bassa», disch Fanzun sün dumonda. Natüralmaing vessa’l giavüschà daplü preschentscha a l’arrandschamaint a Scuol.
Realisà üna quota da 50 %
Il tema da las sairadas es stat sco manzunà il model da Flem per promouver il spazi d’abitaziuns primaras. Cha’l cumün da Flem haja defini ils böts cun üna strategia concreta davart prümas abitaziuns ed affars d’allogiamaint, ha infuormà Corina Caluori. Cha’l prüm pass saja stat dad eruir il nomer concret da prümas e seguondas abitaziuns e da realisar ün monitoring dal marchà d’abitaziuns. In seguit ha il cumün da Flem vuglü reglar e restrendscher la fabrica da seguondas abitaziuns, reglar e mantegner il marchà da prümas abitaziuns, promouver nouv spazi d’abitar per indigens cun s-chaffir üna quota directiva. Il model prevezzaiva eir da restrendscher la pussibiltà da finanziar allogis turistics culla vendita da seguondas abitaziuns. Al cumün da Flem esa in seguit reuschi da realisar culla ledscha correspundenta e culla revisiun da la planisaziun tanter oter üna quota da 50 % prümas abitaziuns per tout ils stabilimaints, voul dir pro renovaziuns ed ingrondimaints per daplü co 30 % da la surfatscha abitabla da chasas existentas o pro nouvs stabilimaints. Sco cha Corina Caluori ha infuormà, vain in vigur üna taxa da cumpensaziun, scha la regla nu vain accumplida. Il suveran da Flem ha acceptà quista ledscha a la fin dal 2023.
Acceptabel pella majoranza
Sco cha la referenta ha tradi, saja l’infuormaziun e la promoziun da la nouva ledscha statta decisiva per l’acceptanza illa populaziun. Cha da rablar tras masüras concretas in votumaziun nu saja adüna simpel. Cha il prüm haja la suprastanza cumünala stuvü gnir persvasa ed in seguit tuot la populaziun. Cha perquai haja vuglü varsaquantas sairadas d’orientaziun per tuot las branschas e blera lavur da lobi e da persvasiun. «Mincha proposta e mincha soluziun sto finalmaing esser acceptabla pella majoranza», ha dit la giurista Corina Caluori.
Eir la società Anna Florin ha elavurà ün catalog da propostas per la regulaziun da seguondas abitaziuns e pella promoziun da spazi d’abitar per indigens. Sco cha’l president dad Anna Florin, Riet Fanzun, ha agiunt, vöglia la società sensibilisar cuntinuadamaing pella tematica e cha perquai organisescha la società eir regularmaing occurrenzas e sairadas d’infuormaziun. El spera cha in avegnir vegnan quellas eir in Engiadina Bassa darcheu visitadas plü bain.
www.annaflorin.ch
Gust da leger dapli?