Stada sen la cupetga è angal ena dumonda da credit
Sainza discussiuns pi grondas ò igl suveran digl cumegn da Surses accepto igl preventiv 2025 tgi cumpeglia er igl deficit da 2 milliuns francs dalla Center da Sanadad Savognin SA. Glindesde seira dalla radunanza communala èn votants e votantas er sa mussos generous cun deliberar ena somma da 4,5 milliuns francs per divers projects.
Alla davosa radunanza communala da chest onn digl cumegn da Surses èn cumpareidas glindesde passo 119 persungas cugl dretg da votar ed uscheia 6,6 % dallas votantas e digls votants digl cumegn da Surses. An tavla èn stadas 13 tractandas, cunzont tractandas tg’on gia da far cun cefras. Cun chella radunanza communala vo planget er a fegn igl amprem onn presidial da Daniel Wasescha. Per el èn igls davos 12 meis stos tot oter tgi angal simpels scu persunga noviza agl timung digl cumegn da Surses. Numnos seian cò per exaimpel igl project solar Nandro, tg’ò fatg naufragi ed alloura cunzont la situaziun finanziala dalla Center da Sanadad Savognin SA. Do ègl per Daniel Wasescha alloura er bels muments scu l’avertura digl hotel Liun agls Mulegns e l’amprema badigleida dalla nova scola a Savognin.
L’amprema geda en sustign finanzial pigl spital aint igl preventiv
Igls preschaints e las preschaintas on gia d’approvar igl preventiv 2025. Tar expensas da 39,814 milliuns francs ed antradas da 37,841 milliuns francs sera chel cun en surple d’expensas dad 1,973 milliuns francs.
Per l’amprema geda siva dalla fusiun digls nov cumegns dalla val igl 2016 tigl cumegn da Surses figurescha aint igl preventiv ena somma da 2 milliuns francs scu sustign finanzial per la Center da Sanadad Savognin SA. Sainza risguardar chella contribuziun da menaschi digl cumegn da Surses agl spital da Savognin dessigl tigl preventiv 2025 en gudogn da 26 800 francs, en retgav aint igl rom digls preventivs digls onns precedents.
Igl cumegn da Surses prevei da far igl onn proxim investiziuns nettas per ena somma da 16,484 milliuns francs. La somma dallas investiziuns bruttas schea tar 21,451 milliuns francs. Menziuno seia tgi angal la somma brutta dalla nova tgesa da scola monta a 10,735 milliuns francs e gravegia la somma d’investiziuns. Tigl preventiv sez ègl strousch do discussiuns, mabagn pitost tigl sustign finanzial general digl spital cun gio aveir contribuia igl cumegn ples a chints (Vorschuss) alla Center da Sanadad Savognin SA. Daniel Wasescha ò detg tgi igl cumegn da Surses vegia fatg chegl cunzont per tgi igl menaschi digl spital seia liquid e tgi seia pussebel da paer las paias agls passa 100 ampluias. Igl suveran ò approvo igl preventiv 2025 cun 110 : 1 vousch.
Pe da taglia resta sen 90 %
Pigl onn 2023 è nia sbasso igl pe da taglia da 100 % dalla taglia cantunala simpla sen 90 %. Er igl 2025 resta chel pe da taglia tar 90 % dalla taglia cantunala simpla. Neida fatga è er la dumonda schi la finanziaziun digl spital savess eventualmaintg aveir ena consequenza pigl pe da taglia communal. Daniel Fitzi, igl schef da finanzas digl cumegn da Surses ò detg tgi chella calculaziun ins vegia pigl mument betg anc fatg. Decidia ò la radunanza communala da glindesde seira, chegl cun 117 : 0 vouschs, da lascher igl pe da taglia da cumegn tar 90 %.
Sanaziun e renovaziun da dus veias
Gia da deliberar on igls 119 preschaints e preschaintas credits per ples projects e chegl per ena somma totala da 4,5 milliuns francs. L’investiziun pigl provedimaint d’ava a Burvagn monta a 485 000 francs. La lengia da deflussiun davent dalla funtanga Promastgel tigl reservuar Burvagn datescha digl 1986, ò ena lunghezza da 2,2 kilometers ed è neida aint igls onns. Cun chel project duess neir piglia ord funcziun igl indrez existent. Da nov vign la curt da Burvagn a retrer l’ava digl provedimaint d’ava existent da Salouf. Tenor Adrian Ballat, igl vicemastral, la miglra da treis schliaziuns pusseblas. Igl credit è nia delibero cun 117 : 0 vouschs.
La renovaziun dalla Veia Sot Curt a Savognin cun ena lunghezza da 138 meters costa 615 000 francs. Chella somma è neida approvada cun 113 : 1 vousch.
Per la Veia Fusso a Tinizong, tgi antscheva tar la veia naziunala a Cadras all’antschatta dalla vischnanca e magna an direcziun da sidost veagiu tar la Gelgia e per lung da chella anfignen tar la cruschada davant la plazza da ballape è er neida fatga ena dumonda da credit. Igl amprem tschancung siva dalla veia naziunala anfignen tar la centrala dall’ovra electrica digl EWZ è nia construia digl EWZ an connex cun la construcziun dalla centrala dall’ovra electrica e renovo all’antschatta digls onns 2000. Aint igl frataimp ò igl cumegn da Surses surpiglia digl EWZ chel tschancung dalla veia ed ò agiunto avant dus onns en li d’untgeida. Tigl sagond tschancung siva dalla punt tgi magna dalla centrala dall’ovra electrica anfignen tar la plazza da ballape sa tractigl d’ena veia da fons asfaltada an possess digl cumegn. Chella ò da neir sanada ed er schlargeda da 3,00 sen 3,50 meters. Igls costs da chella sanaziun cun ena lunghezza da veia da 376 meters montan a 740 000 francs. Per chella somma ò igl suveran do gleisch verda e chegl cun 106 : 1 vousch.
800 000 francs per parcadis a Beiva
Da piglier ord funcziun la staziun da trafo aint igl quartier Visoura a Parsonz cun aveir ella ples defects e per sanar igl trafo tgi sa catta anmez vischnanca tar la plazza da volver dalla posta ò igl cumegn da Surses da far en’investiziun da 450 000 francs. Votants e votantas on delibero chel credit cun 115 : 0 vouschs.
En po daple, numnadamaintg 800 000 francs, costa agl cumegn da Surses la compra da treis parcellas (parcadis) a Beiva. Chellas èn an possess dalla Beiva Runals SA, digl hotel Guidon ed an cumproprietad schizont digl cumegn da Surses. Scu ancunaschaint ò la societad acziunaria digls runals da Beiva cumpro igl hotel Guidon e dovra uscheia igls meds finanzials per finanztgier la compra. Davart dalla societad acziunaria digls runals da Beiva è neida la dumonda, schi igl cumegn da Surses savess finanztgier chella compra cun cumprar las treis parcellas cun parcadis digl hotel Guidon e da Beiva Runals SA. Pigl cumegn seia la compra d’ena parcella er la caschung d’aveir en li per far la nova farmada da posta, ò detg Daniel Wasescha. Do ègl ples votums critics tar chel credit cun esser tuttegna ena bela somma per las treis parcellas. La somma dad 800 000 francs per la compra da chels parcadis è neida deliberada cun 79 : 25 vouschs.
EA pigl «Juliertrail»
La revisiun parziala dalla planisaziun d’utilisaziun dalla veia da velos e da viandar «Juliertrail» è neida approvada. L’expensa brutta per realisar chella veia dalla vart digl cumegn da Surses an ena somma dad 1,45 milliuns francs è neida approvada cun 66 : 39 vouschs. Digl reminent sustigna igl Cantun chel project cun 60 %. Nia detg è tgi seia betg cler tgi tgi mantigna chel tratg per viandar e per bikers. Ed igl è er nia menziuno tgi fetscha ple senn da sustigneir igl spital da Savognin, schi suonda forsa en ulteriour project sumigliaint da Casti anfignen Beiva e schi la taxa turistica vigna eventualmaintg augmentada perveia da chel project. En preschaint ò detg tgi seia dretg da far investiziuns pigl turissem da stad cun sa redutgier cuntinuadamaintg igl turissem d’anviern. Igl cumegn da Silvaplana ò gio delibero la sia part an ena somma da 940 000 francs per realisar chella veia da velos e da viandar «Juliertrail».
«Star attent tigl spital»
Alla fegn dalla radunanza communala ò Daniel Wasescha do anc varsaquantas infurmaziuns. Igl resort Viols a Savognin seia sen bunga veia e proximamaintg vigna inoltrada la dumonda da biagier. Tigl project digl hotel Mövenpick ins seia anc betg schi anavant. An elaboraziun seia er igl concept da traffic per Grava a Savognin. Or digl mez dalla radunanza communala è nia detg tgi la direcziun dalla Center da Sanadad Savognin ed er igl cunsegl d’administraziun seian simplamaintg betg abels da manar chel travagl. Ena persunga ò cunsiglia alla suprastanza digl cumegn da Surses da star attenta tge tgi succeda aint igl futur cugl spital da Savognin. Cun concluder la radunanza communala ò Daniel Wasescha angraztgea alla populaziun da Surses per lour interess politic, cunzont concernent igl project solar Nandro e la situaziun displaschevla dalla Center da Sanadad Savognin SA.
Gust da leger dapli?