L’hom vela dapü
Columna
L’hom vela dapü cu la duonna.
Che?
Cler, queco vezzast dapertuot illa natüra: Il tschierv ho cornas ed es bger pü pesant, il pavun ho üna bellezza da pennas …
E la rauna?
Insomma, il mes-chel rauna es pü pitschen cu la femna, quelo schi. Ma tar la rauna vela «klein aber fein».
E cu es que tar la gillina? Lo vegnan bain mazzos millis da pulschins be già cha’d haun la disfurtüna dad esser mes-chels …
Schi, cler, ma quecò nu poust quinter. Tar la gillina ho l’umaun müdo il scopo originel. L’umaun guarda be pü sülla producziun dad övs, quecò nu poust congualer cul andamaint natürel.
Cha’l chöd illa natüra vess valieu dapü cu la gillina?
In mincha cas, guarda be il chöd sulvedi u l’urugal! Tuot ün’otra preschentscha cu la gillina. U piglia nossa bes-cha grischuna da parada: il stambuoch! L’hom, eau manag il buoch, ho cornas straminablas ed ün pais impreschiunant. Figüra’t cha scu premi al Engadin Skimaraton gnissan dedas las cornettas d’üna chevra da stambuoch. Füss bain da’s trupager!
Ma a me ün chatscheder ho dit ch’el preferiss la charn d’üna chevra …
Quel nu s’inclegia, pover ignorant, sch’el craja cha la chevra vela dapü. Dafatta las reglas da chatscha tegnan quint da la püvalur dal mes-chel: Üna chevra da trais ans chi psaiva 25 kg ho custieu 160 francs. Il buoch però cun sieus 6 ans e 50 kg ho custieu 660 francs! Dafatta la ledscha da chatscha grischuna so cha’l buoch vela dapü.
D’inuonder hest tü quists quistas cifras detagliedas?
Quellas m’ho dit ultimamaing üna chatschedra chi ho per la prüma vouta pudieu ir a chatscha da stambuoch.
Üna chatschedra?
Schi, insomma üna duonnetta chi vo a chatscha.
Aha? Oramai cha in Grischun il mes-chel vela dapü varo’l chatscheder eir da pajer dapü per la patenta?
Tü sbattast. Tü … sbattast simplamaing.
Göri Klainguti da Samedan è autur, pur e pictur.
Gust da leger dapli?