Barschament a Breil– um miera
La notg da sonda sin dumengia hai barschau en ina casa a Breil. In um ei vegnius per la veta, duas persunas ein vegnidas transportadas cun ambulanza el spital.
Cuort avon mesanotg eisi vegniu annunziau alla Polizia cantunala ch’ei vegni fem e flommas or d’ina casa da duas famiglias a Breil. «Ils pumpiers da Breil ein entrai egl edifezi, han stizau spert e cun success igl incendi e purtau in um or dalla habitaziun el plaunterren», scriva la Polizia cantunala en sia communicaziun dalla dumengia. Las emprovas da reanimar igl um – gl’emprem da first-responders ed il miedi local e suenter dil survetsch d’ambulanza – hagien stuiu vegnir interruttas senza success.
Dus ulteriurs habitonts dalla casa ein vegni transportai pervi da suspect d’ina tussegaziun da fem cun ambulanza el Spital regiunal a Glion. Per gl’accumpignament ei il Care Team Grischun staus a disposiziun. (fmr/vi)
Gust da leger dapli?