En favur d’in chantun attractiv

Passà 80 finamiras per l’onn 2025 ha la regenza grischuna preschentà ier mardi en occasiun da ses emprim inscunter mensil da l’onn cun las medias. Tranter las finamiras sa chattan pliras tematicas ch’èn vegnidas numnadas puncts principals.

parter

«Il program da la Regenza ed il plan da finanzas èn ils instruments centrals da la gestiun strategica e politica da noss chantun», ha il president da la regenza Marcus Caduff ditg en ses pled introductiv. Il program per 2025 sa focusseschia sin ils puncts centrals «transfurmaziun digitala», «viver e lavurar», «clima ed ambient» sco era «Grischun attractiv». Quels temas sajan il fundament dal Program da la Regenza da la perioda 2025–2028, uschia il nov president da la Regenza. Las 83 finamiras stipuladas per 2025 èn vegnidas tractadas en il Cussegl grond en la sessiun da december 2024.

Iniziativas per il persunal

Il Chantun vul meglierar l’attractivitad sco patrun. Uschia duai vegnir instradada ina nova strategia da recrutaziun da persunal. Plinavant vul la Regenza laschar elavurar in concept per il svilup dal persunal e per il management da talents sco er per il svilup d’ina cultura d’interpresa cuminaivla. Martin Bühler, il manader dal departament da finanzas e vischnancas ha er preschentà il project per la revisiun da la lescha da taglia chantunala. Quella lescha che prevesia da distgargiar famiglias e persunas cun activitads da gudogn, vegnia tractada en il Cussegl grond l’avust 2025. L’entrada en vigur saja planisada per l’onn 2026.

Tact da 30 minutas en Surselva

Tenor la cussegliera guvernativa Carmelia Maissen, sco manadra dal departament chantunal d’infrastructura, energia e mobilitad, datti dus puncts principals da ses departament. In è l’introducziun planisada dal tact da mes’ura en Surselva a partir dal december 2025 ed il tact da mes’ura sin il traject tranter Cuira e Son Gagl. Omaduas mesiras duain purtar in cler meglierament da la purschida sin il sectur dal traffic public. Ultra da quai saja la Regenza vidlonder da deliberar la Strategia per il traffic betg motorisà 2037. Carmelia Maissen: «Questa strategia dat respostas a la dumonda, co ch’il traffic betg motorisà duai sa sviluppar a media fin a lunga vista en noss chantun.»

Promover la construcziun d’abitaziuns

En connex cun la nova lescha davart la promoziun d’abitaziuns vuless la Regenza tegnair quint dals svilups e da las discussiuns areguard la stgarsezza e l’augment dals pretschs d’abitaziuns. Questa nova lescha saja medemamain in project central da las finamiras da la Regenza, ha ditg il president da quella e manader dal departament da l’economia publica, Marcus Caduff. «Il punct impurtant da quella nova lescha furma il nov instrument da promoziun che sustegna purtaders d’abitaziuns d’utilitad publica da construir abitaziuns da locaziun favuraivlas.»

«Il gremi colleghial sto funcziunar bain»
Per la segunda giada suenter l’onn 2022 è cusseglier guvernativ Marcus Caduff quest onn president da la regenza grischuna. Ensemen cun ses collegas ha el dà invista als puncts centrals entaifer il program da lavur da la Regenza durant ses onn presidial. La FMR ha fatg trais dumondas a Marcus Caduff.

FMR: Il program annual dalla Regenza per il 2025 cuntegna 83 finamiras. Co vul la Regenza realisar tut quellas finamiras ils proxims 12 mais?

Marcus Caduff: Las finamiras èn repartidas sin passa 40 uffizis chantunals. Mintga uffizi ha communitgà tge mesiras ch’el vul realisar l’onn 2025. I dat differents puncts centrals entaifer las 83 finamiras. In da quels puncts centrals è la Strategia dal persunal chantunal. Quella è fitg impurtanta per ch’ils departaments possian ademplir lur pensums en il futur. In auter punct central è la nova lescha chantunala davart il spazi d’abitar che vegn tractada quest onn en il Cussegl grond.

Vus menziunais gist la nova lescha chantunala per la promoziun dal spazi d’abitar. Co statti cun ils obstachels che quella lescha sto surmuntar enfin ch’ella po ir en vigur?

In punct che vegn segir a dar in pau discussiun en il Cussegl grond èn las contribuziuns «à fonds perdu» per societads che construeschan abitaziuns per dar en locaziun. Ils ­ulteriurs puncts – ils sustegns per acquists da chasas u abitaziuns ed ils emprests da daners èn tenor mai main dispitaivel entaifer il parlament chantunal

Vus presidiais per la segunda giada la Regenza suenter il 2022. Tge bilantscha vulessas Vus pudair trair a la fin da Voss onn presidial 2025?

En mes departament è il sustegn da las canortas d’uffants in tema impurtant, surtut l’implementaziun dal sistem digital per reglar la finanziaziun. I dat sa chapescha anc auters projects che jau vuless deliberar, sche pussaivel. Il pli impurtant per avair success en ina regenza è ch’il gremi colleghial funcziuna bain. Nus stuain funcziunar sco bun team. Envers anora as bada che la confidenza en las instituziuns n’è betg pli uschè gronda sco er gia. En Svizra è quai bain anc meglier ch’en auters pajais. Ma la sceptica envers instituziuns e creschida er tar nus. Mia finamira è en scadin cas da cultivar er cun nossa populaziun dal Grischun ina discussiun averta e transparenta per uschia mantegnair la confidenza.