Mintga fotografia è en unicat

Igl codesch «So nah an einer anderen Welt» cun 76 fotografias tgi la regiun da vacanzas Val Surses Savognin Beiva ò edia an collaboraziun cugl fotograf Daniel Meier è da cunsiglier a mintgign. Cun Surses ò igl fotograf ena relaziun pi strètga.

parter

Ainten mintgigna dallas 150 vals tgi dat aint igl Grischun ins catta lis singulars, cuntradas particularas e posts tgi sa laschan betg cumparagler cun oters. Savens ègl uscheia, tgi per casualitad ins catta uscheia en li tgi sa lascha cumparagler cun en maletg digl pi ancunaschaint pictour.

Gist da chels posts, flatgs e lis dattigl er an Surses e chegl davent digl Pass digl Gelgia anfignen a Salouf. Ena persunga tg’ò scuvert an Surses en li pi bel tgi l’oter è Daniel Meier. El magna a Zollikon en’agentura da communicaziun ed egna dallas sias passiuns è er fotografar. Cun Surses ò el siva da 14 onns ena relaziun pi strètga cun aveir ena tgesa da vacanzas a Tigignas. Tant scu pussebel passainta el igl sies taimp liber an Surses e giolda da girar cugl sies tgang Luna sur colms e vals.

La camera da fotografar mantga mai

Dasper igl tgang Luna – en accumpagneder fidevel da Daniel Meier durant mintga viandada – mantga er betg la camera da fotografar. Chella totga tar igl sies equipamaint da viandar scu igl lascher cun proviant. Igl Turitges e fotograf dei: «Igl è betg uscheia tg’ia ma decid per ena viandada cugl intent da far an en li fotografias, persiva ma decida spontan da far la fotografia.»

Daniel Meier dei er tgi seia d’esser igl dretg mument aint igl dretg li, la gleisch saptga per exaimpel sa midar an en colp, pero er l’ambianza generala e schizont l’ora. «Igl è propi uscheia tgi las pi belas fotografias dattigl sainza eir alla tschertga da motivs spezials, mabagn simplamaintg graztga alla casualitad e la spontanitad», dei igl fotograf.

Tot oter tgi simpel da far la schelta

La collaboraziun cun Turissem Val Surses Savognin Beiva seia sa dada cun metter a disposiziun adegna puspe fotografias per ples adievers turistics. An chels 14 onns tgi Surses seia davanto la sia sagonda patria, vegia el fatg mellas e mellas fotografias, punctuescha Daniel Meier. «Da far la schelta dallas 38 fotografias da stad e las 38 fotografias d’anviern pigl codesch è ansomma betg sto simpel.» El vegia fatg ena collecziun dallas fotografias ed an collaboraziun cun Tanja Amacher, la directoura turistica, e Luana Tscharner, la sia substituta, ins vegia alla fegn finala decidia tge 76 fotografias tgi duessan cumpareir aint igl codesch.

L’egna u l’otra fotografia vegia el schizont fatg avant diesch onns e fatg gugent adiever da chella pigl codesch da fotografias cumparia avant curt. Daniel Meier dei: «La nateira resta adegna tuttegna e gist cun eir fitg ad ot dattigl bler da scurveir.» 


Mintga fotografia è collieida cun en link d’ena ruta da viandar, per ena tura da skis, da gianellas e da passlung. Da retrer è igl codesch «So nah an einer anderen Welt» per 29 francs aint igl biro turistic a Savognin.