Il tip – 40 differents desserts sin la Corviglia

parter

Savevas Vus che la firma da skis Head ha sco emprima laschà patentar il ski da metal, e quai gia l’onn 1949? Avant era lain anc il material principal.

Savevas Vus, ch’il general svizzer Henri Guisan veseva ils culms ed il sport d’enviern sco ideal lieu per tancar las forzas fisicas e moralas?

Savevas Vus, ch’il cuschinier Hartly Mathis ha servì l’onn 1967 – e quai en l’emprima ustaria da gourmet en in territori da skis, sin il Corviglia – vers 40 differents desserts a ses giasts?

Audrey Hepburn, Gunther Sachs, John Lennon (guarda front) ed il schah da la Persia – els han tuts insatge communabel. Els vegnivan gugent a San Murezzan en vacanzas.

Quels ed ulteriurs ‹fun-facts› da l’impressiunanta istorgia dal turissem d’enviern pudais Vus leger en il cudesch ‹Schnee, Sonne und Stars- wie der Wintertouris­mus von St. Moritz aus die Alpen erobert hat› da Michael Lütscher. Il cudesch è cumparì l’onn 2014 tar la chasa editura Neue Zürcher Zeitung. La publicaziun cuntegna vasts excurs istorics, bellas fotografias e squitschs da placats legendars da destinaziuns enconuschentas sin tut il mund.

Tenor mai è quel cudesch in stuair per amis ed amias dal sport d’enviern. Ed ideal da leger, sche l’aura n’è ina giada betg bell’avunda per ir cun ils skis. Ed uschia vegn la pista transferida en furma dad in cudesch en stiva.


Di per di dat ina redactura u in redactur da la FMR in tip a lecturas e lecturs – in cussegl u ina recumandaziun, senza impegn e senza garanzia che quel «tip» plaschia alura a tuttas e tuts.