Spazi da habitar dretg e seniester

La vischnaunca Ilanz/Glion ei vidlunder da scaffir las premissas per siu svilup, ina da quellas ei il spazi da habitar e da viver. Quei che pertucca il marcau da Glion vegnan actualmein dus loghens el center: gl’areal Maissen egl ost ed il quatier Spaniu el vest.

parter

Dumengia vargada ha il suveran da Glion approbau cun gronda maioritad la cumpra digl areal Maissen. Quei munta che la vischnaunca sappi ussa cumprar dalla Repower la surfatscha da rodund 6300 m2 denter la staziun dalla Viafier retica, il Glogn e la via dil Glogn. Leu vegn ei a dar il proxim futur denter 60 ed 80 habitaziuns da tuttas grondezias. En siu messadi a votantas e votants haveva la vischnaunca annunziau ch’ei detti gia in project directiv corrispundent. La possessura Repower haveva schau far in tal, sin quei haveva la vischnaunca organisau e decidiu il plan da quatier per quella zona nova da habitar e commerci. Sper las habitaziuns detti ei – previsiblamein – el plaunterren dallas treis casas era spazi per commerci e mistregn.

Indicau el model directiv MTC

Gl’areal Maissen, egl ost dil marcau da Glion, culla surbaghegiada, ei indicaus el model directiv dil territori communal (MTC). Quei instrument dalla planisaziun ha la suprastonza communala dad Ilanz/Glion approbau ils 6 d’avrel 2021, sco tuttas vischnauncas grischunas eis ella stada sfurzada d’elaborar quel. E sco ei para eis ei buca in «pupi» ch’ei ius en in truchet en casa communala. Il MTC haveva viu in’auter territori adattau per spazi da habitar: A Spaniu, da tschella vart dil marcau, viers vest, savess ei dar il proxim futur ulteriuras 70 tochen 80 habitaziuns. Sin pagina 69 dil model directiv ei Spaniu presentau sco zona adattada da scaffir «pusseivladads per fuormas da habitar alternativas sco co-living ni luvrar ed habitar, ni era projects per pliras generaziuns». Las suandontas paginas dil MTC muossan visualisaziuns co ina surbaghegiada da Spaniu savess veser ora.

Architectura urbana

Il project «areal Maissen» vegn ussa realisaus demai che la vischnaunca ha tut ils interess da surbaghegiar la parcella. Cugl «areal Spaniu» ei quei auter. La surfatscha da biebein 7000 m2 ei en possess da diversas famiglias e persunas privatas. «Actualmein va la concurrenza d’architectura urbanistica, ina procedura che fa part dalla planisaziun da quatier», declara Andreas Pfister. Il menader dalla planisaziun e commember dalla direcziun dalla vischnaunca Ilanz/Glion explichescha ch’ei detti el decuors dil 2025 ina presentaziun dils resultats per ina surbaghegiada dil quatier Spaniu. Conform allas normas dalla planisaziun eis ei pusseivel da baghegiar casas da pliras e casas d’in famiglia d’omisduas varts dalla Via Spaniu. Ei dess leu in quatier da habitar niev cun totalmein tochen 80 habitaziuns. Denter il Coop vegl e Via Runcaleida che meina viers la rundella Runcaleida dess ei ina zona da habitar cun bia verd. Dalla vart encunter il santeri da s. Giusep resta ina gronda surfatscha libra, quella ei attribuida alla zona d’agricultura.