«In bien nas ei igl a ed igl o»
Dapi igl onn 2001 ei Gion Candinas brischavinars a Surrein. Il barschar vinars ei denton tradiziun da famiglia dapi 150 onns tier ils Candinas. Gion fa quei ella sisavla generaziun e siu fegl Ursin vegn a surprender la destillaria. Amiez la stagiun da barschar vinars ha la FMR fatg ina viseta al brischavinars Gion Candinas amiez il vitg da Surrein.
Cura ch’il schurnalist dalla FMR ei arrivaus sigl areal dil menaschi da Gion Candinas a Surrein, ha el dumbrau avon l’entrada tier la destillaria ina ventgina da buots e butschins blaus empleni cun maischa. «Igl ei da grond avantatg, sche la maischa ha ruassau ditg», manegia il brischavinars. «Il meglier vinars dattan ils fretgs ch’ein bunamein surmadirs.»
Els temps intensivs da lavur ella destillaria vegn Gion Candinas sustenius da sia consorta Anna Candinas e dil fegl Ursin Candinas che ha absolviu il Plantahof e che vegn a surprender il menaschi da ses geniturs.
Dapi biebein 150 onns
«Jeu sun la sisavla generaziun da brischavinars a Surrein», di Gion Candinas. «E sco ei ves’ora vegn miu fegl Ursin a surprender la destillaria.» Ed Ursin Candinas confirmescha: «Jeu saiel aunc buca cu, mo igl ei clar che jeu vegnel a far vinavon la destillaria ed il menaschi puril da mes geniturs.» La famiglia Candinas a Surrein Plazzas brischa vinars dapi pressapauc 150 onns.
Gion Candinas declara ch’ei hagi mo en siu temps sco brischavinars dau in pulit svilup sil sectur dalla destillaziun. «Mia dunna Anna ed jeu havein surpriu la destillaria da miu bab igl onn 2001. Enteifer quei temps ein cunzun las pretensiuns da qualitad dil vinars carschidas.» Ina buna qualitad dil vinars pretendi denton era ch’ils fretgs seigien da buna qualitad, di Gion Candinas.
«2024 ed entochen ussa havein nus in onn da buna qualitad cun biara péra, meila e zuescas da barschar. Tschereschas hai dau empau pli paucas igl onn vargau.»
Clientella dalla entira Svizra
Ella media brischa Gion Candinas biabein 20 000 liters vinars per onn. Ina gronda part brischa Gion Candinas per sia clientella che vegn dalla Surselva e dil rest dil Grischun, mo era dalla Bassa. Dalla «brennaria» sco Gion Candinas numna sia destillaria sortan vinars da puma, da prema, da tschereschas e sin giavisch era il prezius vinars d’ansauna. Plinavon producescha Gion Candinas era must dultsch sin empustaziun. Els emprovien – sche zaco pusseivel – d’ademplir mintga giavisch dalla clientella, tradescha il brischavinars da Surrein.
Il d’ansauna
«Nies pli enconuschent destilat ch’ei nossa specialitad dalla casa dapi generaziuns ei il vinars d’ansauna che nus producin sez or dalla ragisch dall’ansauna melna e cotschna dallas Alps», aschia il brischavinars e pur da bio da Surrein. Gion Candinas di era ch’el brischi fetg bugen ils differents vinars da jarvas alpinas. Quei seigi ina disciplina fetg speciala per el sco brischavinars. Il particular vid quels vinars da jarvas seigien las odurs fantasticas. «In bien brischavinars sto haver in fetg bien e fin nas. Il nas ei igl a ed igl o, vul dir igl organ il pli impurtont che controllescha sco emprem la qualitad dil vinars.»
Il gin «Breil Pur»
In dils products ils pli enconuschents ord la destillaria Candinas ei il gin «Breil Pur» ch’ei vegnius lantschaus entuorn igl onn 2013 da dus commerciants svizzers. Tenor la pagina d’internet ufficiala da «Breil Pur» ein la geneivra alpina, la crestatgiet e la menta da tschugalatta treis dallas ingredienzas dil gin. Dapli tradeschi el buca, di il brischavinars Gion Candinas da Surrein sin la pagina d’internet. «‹Breil Pur› ei in client special che possibilitescha a nus da barschar vinars era la stad.» Ad interim seigi la destillaria en funcziun igl entir onn.
Els aviuns dalla Swiss
Il gin «Breil Pur» ord la destillaria da Gion Candinas san ins era cumprar els aviuns dalla Swiss. «Cheu havein nus giu ina legra supresa avon entgins onns», raquenta Gion Candinas. «In di steva tuttenina ina gruppa da persunal dalla Swiss avon casa. Las flight attendants ed ils pilots havevan decidiu spontan d’ir a mirar il liug ch’il ‹Breil Pur› da lur aviuns vegni barschaus.» Quels hagien schau plascher aschi bein, ch’els seigien restai in entir suentermiezdi en destillaria. Gion Candinas raquenta che la fin finala seigi la «Brennaria Candinas» vegnida stampada el carnet che sesanfli en mintga plaz da tut ils aviuns dalla Swiss. Quei hagi evocau biars novs contacts e damondas e munti ina gronda honur per el e sia famiglia. «Biara glieud ha l’impressiun che nus seigien ina fabrica da spirituosas ed ein lu surstai d’udir che nus essan ina sempla destillaria da muntogna», manegia il brischavinars da Surrein.
Lavur da team
«Barschar vinars sto esser ina passiun», raquenta Gion Candinas en discuors cun la FMR. «Il brischavinars sto era esser innovativs ed impunder temps per empruar caussas novas.» Ei drovi empau perseveronza e forsa dapli peda che avon onns per vegnir tier in vinars da buna qualitad. Per el seigi igl agid da sia famiglia indispensabels. «Sch’jeu patratgel vid l’entira lavur da biro che mia dunna Anna fa, ni sch’jeu considereschel il sustegn ch’jeu haiel da mes fegls cun resgiar e fender lenna, stos jeu dir che quei funcziunass mai senza il grond sustegn da mia famiglia.»
Gust da leger dapli?