El tact e cun cacofonia
Paucs carrs decorai, biars affons costumai, mascaradas, bialas e nauschas, ei stai sin via sonda suentermiezgi a Glion. La musica da gugga Grischalottas da Glion ha organisau il til da tscheiver. En tut ein 25 gruppas separticipadas.
«Ou ou, na, da quels cheu vai jeu tema. Jeu sai buca mirar!» ha ina dunna agl ur dalla via manegiau. Malgrad ch’ella era schurmegiada da glieud, han ils «Giavels da Glion» tementau ella cun lur cadeinas e mascras nauschas. Sche buca a Glion, caschuna quella gruppa da tscheiver mintg’onn battacor en auters loghens. Ella ei sespecialisada da tschappar singulas persunas e da ligiar quellas vid ina roda che dus giavels mettan en moviment. Suenter la procedura laian els puspei liber lur unfrenda.
«Priu silla corna» ils capricorns
Biars aspectaturs ch’ein mitschai sonda suentermiezgi dils nauschs han giu il gaudi dalla scena, auters ein sezuppai tochen ch’els eran vargai. Per cletg han ins entupau al tscheiver da Glion biaras gruppas ch’ins ha pli bugen. Las Grischalottas da Glion/Falera han organisau in til gagl e divertent. Il carr decorau ch’ei daus en egl ei quel dils capricorns. Ina gruppa da Glion ha «priu silla corna» la vendita dils capricorns culs uoppens dallas fracziuns. Giu dil carr han quel capricorns salidau il pievel agl ur dalla via.
Al til da tscheiver da Glion ein 25 gruppas separticipadas uonn. Auter ch’ils giavels che han fatg pial-gaglina han ins viu ils nanins carins entuorn lur tegia sil carr. Uorsets polars ein circulai, giombers e pinguins, ruogs da matg gigants cun fluras. Ins ha smarvegliau dallas ideas creativas. Ils affons dalla termagliera da Schnaus, dalla scoletta da Rueun e dalla gruppa da giugs da Castrisch han giu tschaffen dil gaudi cun costums, tact e cacofonia. Gest tuttina sco las persunas dalla Casa Depuoz, per ellas ei il tscheiver in accent impurtont digl onn.
E tgei fuss tscheiver senza musica? Nunpusseivel da s’immaginar, lu dess ei negin tscheiver. A Glion ein IIs Vagabunds da Tujetsch, Las Latiarnas da Danis, Las Lieurs da Trun, Las Patlaunas da Breil, Las Sgarellas da Domat, ils Rappaguggers da Zezras ed ils Igla Gugger da Landquart separticipai. Aschia han las Grischalottas giu tschaffen d’ina veritabla fiasta dallas guggas grischunas.
Gust da leger dapli?