La medema DNA sco avon 90 onns

Uonn festivescha il Club da skis Trin siu 90avel anniversari. Cun actualmein 314 commembers eis ei la pli gronda uniun da Trin. Sco antruras tgiran pign e grond, giuven e vegl, la cumpignia e gaudan il moviment sin skis ed ella neiv.

parter

In grond mument seigi quei stau, conceda Gianmarco Spreiter. Ei seigi stau ils 2 da december 2023 ch’ei havevi dau in detg tatsch neiv. Quella sonda avonmiezgi era il president dil Club da skis Trin envidaus a Cuera alla surdada dil premi «Benevol Grischun». El havevi preparau in plaid e semtgau entginas impressiuns per presentar il club. Gianmarco Spreiter supponeva d’esser en ina selecziun finala ensemen cun uniuns d’autras regiuns. La giuria haveva denton gia decidiu ed il president dil Club da skis Trin ha mo aunc stuiu ir anavon. Cusseglier guvernativ Martin Bühler ha sin quei surdau al club da Trin il premi da renconuschientscha Benevol Grischun.

60 affons e giuvenils ella G+S

«Quei ei stau in mument commuentont per mei», seregorda Gianmarco Spreiter. El presidiescha il sisavel onn il Club da skis Trin. Cun 314 commembers eis ei l’uniun pli gronda da Trin. Il premi Benevol ha ella retschiert per la prestaziun ch’il president circumscriva aschia: «Dapi l’entschatta tochen oz ei la filosofia restada la medema. Nus s’engaschein per la cumpignia e per in’occupaziun dil temps liber che fa senn», gi Gianmarco Spreiter. Las activitads dil club dueien colligiar tuttas generaziuns e porscher moviment per pign e grond. Igl onn 1935 havevan endisch giuvens da Trin fundau in club da skis. Els vulevan promover il sport da skis e la cumpignia. Gia il mars 1935, pia avon exact 90 onns, haveva ei dau ina emprema cuorsa da skis da Munt Sut tochen Mundadiras. In onn pli tard eran ils participonts parti sill’Alp Mora, la cuorsa haveva menau giu Maliens.Da gliez temps s’udevi tiel divertiment da far pista e d’ascender culs skis tochen alla partenza.

«Dapi la fundaziun ei gl’intent dil club buca semidaus. Nus promovin e tgirein aunc adina cul medem fiug il sport da neiv e la cumpignia», declara Gianmarco Spreiter. All’entschatta dils statuts eis ei era definiu ch’il Club da skis da Trin fetschi part dallas uniuns tetgalas Swiss Ski ed Associaziun grischuna da skis. Ursina Hardegger ei co-menadra d’ina impurtonta secziun dil club. L’organisaziun G+S cun circa 60 affons e giuvenils e 20-30 menaders funcziuna a moda autonoma. Gl’atun entscheivan ils trenaments ella halla e schi prest ch’ei dat neiv sillas pistas dil Crap Sogn Gion. «Igl ei nossa incumbensa da dar alla generaziun giuvna in bien sacados e da scolar els bein», explichescha Ursina Hardegger. La participaziun ella G+S dueigi esser pils affons e giuvenils ina sigliera. Tgi che hagi tschaffen, plascher e talent sappi avanzar ella gruppa RLS. Igl ei la cuminonza da cuorsas ch’ils da Trin han fundau ensemen culs clubs da skis Crap Sogn Gion e Flem. «Ina tiarza dallas commembras e dils commembers da quella gruppa da prestaziun e cuorsas ei da Trin.

Gis pils «grischs»

Schi biaras e biars havein nus da Trin aunc mai giu», constatescha Gianmarco Spreiter. El dat gronda peisa alla lavur pils affons e giuvenils. Tuttina dat el d’entellir che la gronda part dallas 314 commembras e commembers s’audien tiels carschi. «Tgirar quella gruppa ei nuotameins central», gi il president. Digl atun tochen la primavera porscha il club mintga meins silmeins ina activitad. Il gi da skis dils seniors, la gimnastica jamnila en halla, in gi sin pista cun skis da telemark ed ina sera da curling s’audan tier. Gianmarco Spreiter lai denton valer ch’ins stoppi dar adatg da buca surcargar il program d’activitads.

Uonn ad Airolo

La radunonza generala e la sera dil club cun rangaziun ein duas occurrenzas classivas ch’ein frequentadas mintgamai fetg bein. La davosa sera dil club ei stada miez fevrer 2025. A quella ha la suprastonza vuliu dar in accent al giubileum da 90 onns. Il tema ei staus «ils onns 90». El center ein buca moda, musica ed eveniments nostalgics stai, mobein tut quei ch’ins s’immaginescha dils onns 90.

L’ustria Ringel e la sala da quella ei dapi la fundaziun il local da tschep dil Club da skis. «Leu ha ei dau gia biaras fiastas», remarca Gianmarco Spreiter. La cuorsa dil club e mintga treis onns in viadi s’audan era tier las activitads. Uonn, gest sil 90avel anniversari, ei il termin dil viadi. Sco Gianmarco Spreiter tradescha meina quel mintgamai en in territori da skis pli pign e nunenconuschent. «Uonn mein nus cun in car plein commembras e commembers ad Airolo», tradescha il president. Sisum la Valle Leventina emprendan ils da Trin d’enconuscher las pistas da Pesciüm.