Cas Raiffeisen – pals en las rodas
Els frainan tge ch’els pon, ils advocats da Pierin Vincenz e dals auters condemnads en il process Raiffeisen. Strusch ch’il Tribunal federal ha communitgà che la Dretgira superiura da Turitg stoppia decider l’appellaziun, retegna in nov rampign l’andament.
Protestar davant dretgira pon ins cun recurrer ed appellar. Sche quai na gida nagut, pon ins anc pretender ina revisiun. Quellas han darar success. Ma gist ina tala han pretendì ils advocats en il cas Raiffeisen. La revisiun sa drizza cunter la decisiun dal Tribunal federal ch’è vegnida communitgada avant duas emnas dis.
Losanna na di nagut
En lezza decisiun aveva Losanna refusà las protestas che l’act d’accusaziun saja stà bler memia lung e che las actas na sajan betg vegnidas translatadas tuttas per franzos per in dals accusads. En pli ha il Tribunal federal incumbensà la Dretgira superiura da Turitg da decider l’appellaziun – pia da sa fatschentar cun il coc – schebain ils condemnads èn vairamain culpants ed han propi dad ir en praschun.
Uss è pia pendenta ina revisiun cunter questa decisiun da Losanna. La FMR ha vulì savair dal post da medias dal Tribunal federal, tgi che haja pretendì la revisiun e pertge. Il post da medias n’ha fatg naginas indicaziuns. Cler è be ch’i vegn mess pals en las rodas a las dretgiras che s’occupan cun il cas Raiffeisen.
Gasetta da la dumengia è bain infurmada
«Els na laschan ora nagina emprova da trair a la lunga il cas», scriva la Sonntags-Zeitung da la dumengia passada. Ils advocats veglian per tut pretsch preservar lur clients da la praschun. La gasetta posseda para buns contacts e sa dapli: Ils advocats renfatschian uss ad in dals procuraturs publics, che han examinà il cas, dad esser implitgà, vul dir: da betg esser nunpartischant.
Pertge? Il procuratur public haja dumandà ses anteriur professer, tar il qual el haja doctorà, per in parairi en il cas Raiffeisen. Perquai stoppia quest procuratur prender recusaziun e na dastgia betg sa fatschentar cun il cas. Tar il professer da dretg sa tracti dal reminent dad Andreas Donatsch, oriundamain in Grischun. È la relaziun tranter in professer ed in doctorand uschè stretga ch’i regia suenter partischantadad? Il Tribunal federal è sfurzà pervi da la revisiun da prender sut la marella la chaussa.
Betg perder la survista – ina cronologia
Da tegnair la survista en la procedura Raiffeisen n’è betg simpel. Quai fiss la recapitulaziun cronologica:
Avant set onns è l’anteriur schef da la banca Raiffeisen Pierin Vincenz vegnì mess en arrest d’inquisiziun per passa trais mais.
Il 2022 è stà il process en emprim’instanza: La Dretgira districtuala da Turitg ha sentenzià Pierin Vincenz a bunamain quatter onns praschun perquai ch’el ha engianà e sfalsifitgà documents cun cumpras da firmas. Ses anteriur cumpogn Beat Stocker ed anc ulteriurs accusads èn medemamain vegnids condemnads. Els han appellà.
La segund’instanza, la Dretgira superiura da Turitg, ha annullà il 2024 la condemnaziun pervi da sbagls procedurals: translaziuns mancantas e la lunghezza da l’act d’accusaziun.
Encunter gliez ha protestà la procuratura publica. Ella ha survegnì raschun dal Tribunal federal che ha dà enconuschent avant duas emnas che las condemnaziuns en emprim’instanza hajan puspè vigur e che la segunda instanza stoppia decider davart l’appellaziun.
E la novissima vieuta en quest’odissea giuridica è: Ils advocats en il cas Raiffeisen pretendan dal Tribunal federal ina revisiun pervi d’ina eventuala partischantadad d’in procuratur public che ha dumandà ses professer per in parairi.
Gust da leger dapli?