Dapli accidents, però pli paucs morts
L’onn passà hai dà en il Grischun en tut 2445 accidents da traffic. Il dumber è s’augmentà levet. Il dumber da persunas mortas sin vias grischunas è dentant sa reducì.
Cun 2445 accidents da traffic durant l’onn 2024 s’augmenta puspè il dumber d’accidents en Grischun. Quai resulta ord la statistica d’accidents da traffic che la Polizia chantunala ha publitgà. Il dumber è s’augmentà, ma igl haja er en general dà dapli traffic sin las vias grischunas.
Tar quests accidents èn mortas 10 persunas, 582 persunas èn vegnidas blessadas. Sco che la Polizia chantunala scriva, saja quai la pli bassa valur dad accidents cun persunas mortas dals ultims 10 onns. Il dumber da persunas cun blessuras gravantas è dentant creschì.
Plinavant hai era dà pli paucs accidents cun peduns, velos ubain motos. Quai saja ina buna tendenza. Ins haja dentant era stuì constatar ch’i dettia dapli persunas blessadas grevamain tar accidents cun motos. Igl haja dà dapli accidents da traffic entaifer ils vitgs, percunter ina leva reducziun dal dumber d’accidents da traffic ordaifer ils vitgs. . Plinavant è il dumber d’accidents sut influenza d’alcohol s’augmentà – en tut eran quai 108 accidents (quai èn nov dapli che l’onn avant).
In dals motivs: la sveltezza
Anc adina sajan sveltezzas memia autas in grond problem en connex cun ils accidents. Ma betg tut ils accidents sajan capitads be pervia d’ina spertezza memia auta. Er il dumber d’accidents pervia da distracziun u d’inattenziun saja anc adina aut. Tenor la Polizia chantunala stoppian ins intensivar las controllas en quests secturs. Er accidents cun animals selvadis datti relativamain savens: l’onn passà eran quai 683 accidents, dentant be 6 cun donns da persunas.
Ils pli blers accidents capitian enturn las 06.00 la damaun, enturn mezdi e lura puspè enturn las 17.00. Durant quel temp èn era bleras persunas da viadi cun auto, per exempel per ir a lavur.
Gust da leger dapli?