Gluva, saida e pazienza endinada
Igl è dumondas banalas: Cun tge guaffen lavura ella gugent? Tge material impunda ella? E tgenin è ses dun principal? Silvie Noemi Demont dat respostas che fan surstar. L’artista retschaiva in premi da renconuschientscha dal chantun Grischun.
Ina pitschna stanza en ina chasa veglia, ina maschina da cuser, ina stanga cun vestgadira fatga sezza – en ses atelier a Lucerna ha Silvie Noemi Demont aposta fatg urden sin che la FMR vegn sin visita. I vesia uschiglio savens ora auter, conceda ella. Sch’ella lavuria sajan rasadas ora tailas e launas tut a dubel. Betg da smirvegliar, Silvie Noemi Demont è studenta, artista ed anc cusunza cun in agen label (guarda box).
Ils 27 da zercladur 2025 retschaiva ella il premi da promoziun dal Grischun. En tut vegnan onuradas 14 persunas per lavur culturala en pliras spartas. La festa ha lieu a Trin.
Simpla guvla
«Mes guaffen preferì èn las gluvas», di Silvie Noemi Demont. «Jau preferesch la gluva d’atschal cun chau plat, betg quella cun chau radund da colur.» Di per di dovria ina cusunza gluvas, senza na fissi gnanc pussaivel da cuser. «Atgnamain sa tracti d’in simpel guaffen. Ma entras la quantitad che jau dovr, survegnan las gluvas ina nova muntada.».
12 751 gluvas ha ella furà en ina taila da saida per sia ovra «Stecken». Las gluvas marcan las lingias da las faudas en la taila gia utilisada avant. L’ovra è stada da vesair a l’ultima exposiziun annuala en il Museum d’art dal Grischun.
Sco stritgs da rispli vesian las gluvas ora da lunsch, explitgescha l’artista. Ellas traglischian auter tut tenor glisch. In contemplader vesia relievs sco cuntradas u culms en l’ovra, ina autra contempladra vegnia regurdada al mastergn da cusunzas che giaja plaunsieu perder e las gluvas che forian simboliseschian ina tscherta vulnerabladad.
Taila rufidada
Launa, tailas, bindels u fils impunda ella. I sa tracta da textilias gia duvradas u da material rufidà che sa tschentass uschiglio en il rument. Silvie Noemi Demont chatta tut quai en brockis u sin fieras da plugls. Magari survegn ella era in telefon d’ina cusunza che fa amogna material ch’ella na dovra betg pli.
I saja ina vaira passiun da sfuignar en mantuns da vestgadira vedra sin fieras da plugls, da palpar las textilias e tuttenina sentir ina taila dad auta qualitad. «Jau poss ir uras a la tschertga», raquinta l’artista che chatta adina puspè in u l’auter stgazi.
Sin ina fiera da plugls a Paris haja ella per exempel cumprà per paucs raps ina chamischa da Louis Vuitton. Ed adina cur ch’ella saja a Cuira, giaja ella en il brocki da l’armada dal salit. Là cumpria ella batlinis u lanziels fixs prest novs per cuser shirts per ses label. «Ina giada hai jau chattà in’entira chista cun tailas da saida», raquinta ella intgantada. Singulas da questas saidas èn oz ovras d’art.
Accuratezza sco dun
«Jau crai ch’jau haja il dun da propi pudair star londervi e m’approfundar en ina chaussa», di l’artista. Ella sa fatschentia lura gugent cun detagls e saja ina perfecziunista. «Jau tegn che quai deriva da mes emprendissadi. Sco cusunza hai jau emprendì che mintga piculezza stoppia constar, uschiglio na sesa il vestgì betg.» Gist per l’ovra cun las gluvas haja ella duvrà quest dun da star londervi uras en ed uras ora. I saja daventà in pau sco ina meditaziun.
Era per l’ovra «Scuser» haja ella duvrà questa accuratezza e pazienza endinada. Durant corona ha Silvie Noemi Demont scusì boxershorts, in t-shirt, in top, ina giacca – en tut diesch tocs vestgadira. Senza rumper ils fils ha ella avert las cusadira da mintga toc. En sasez ha ella fatg gist il cuntrari d’ina cusunza che cusa in vestgi.
A la fin ha ella furmà pitschens mantuns cun ils fils da mintga toc e mussà quels il 2021 a l’exposiziun annuala dal Museum d’art dal Grischun. Ina tavlina ha enumerà il dumber da cusadiras ed ils meters fil da mintga toc. La jeans per exempel ha gì 80 cusadiras e 162,28 meters fil – ina jeans che fiss prest sa tschentada en il rument.
Designra cun agen label
In cudesch cun paginas da taila empè da palpiri – uschia concepescha Silvie Noemi Demont (28) da preschent sia lavur da master a la Scola auta per design ed art a Lucerna. Il tema è «Fäden ziehen». Gliez tutga tar il mintgadi da cusunzas, ina lavur atgnamain invisibla, che la studenta renda vesaivla cun sia lavur da master.
Creschida si è Silvie Noemi Demont a Cuira. Ella ha l’emprim emprendì da cusunza e lavurà en plirs ateliers. Sias ovras d’art èn naschidas or da ses mastergn e consistan da tailas u launas utilisadas. Gliez vala era per la vestgadira da ses label dad upcycling che sa numna «Eivlis». Sut quest label venda ella dapi dus onns shirts, chautschas, rassas, tastgas e chapitschas ch’ella cusa sezza.
L’onn passà ha la Banca Raiffeisen onurà la cusunza per quest label cun in «premi da durabilitad». Quest onn retschaiva ella da la regenza grischuna in premi da promoziun. En la communicaziun stat scrit: «L’artista d’art figurativ e designra da moda collia a moda virtuosa la critica envers l’industria da textilias cun ses projects artistics textils.»
Gust da leger dapli?