Terrada nunnecessaria
Trun/Rabius
Pil secund giug da campiunadi frunta il CB Trun Rabius sill’emprema equipa dil CB Landquart. Il giug ei da gronda impurtonza el cumbat encunter la relegaziun.
Da bialaura e ferm vent dat igl arbiter liber il giug sin la plazza da bal a Landquart-Ried la dumengia suentermiezdi. La partida ei uliva all’entschatta. Trun/Rabius vegn gia naven dall’entschatta tier entginas caschuns da marcar, denton maunca la davosa precisiun. Era Landquart emprova adina puspei da vegnir malsegirs avon il gol da Trun. Quei pil pli cun spertas cunterattaccas, cun excepziun dalla 25avla minuta, cu Landquart vegn tier sia megliera caschun dalla vart dretga, dento senza pli grond success. Suenter 40 minutas sa Gianin Derungs recaltgar il bal ella zona da puniziun dil defensur e mo pli vegnir frenaus cun in foul. Il penalti resultont marca Patrizio Decurtins segir tiegl 1:0 pil hosp dalla Cadi. Cuort avon pausa vegn Landquart aunc inagada tier ina buna caschun, denton sietta igl attaccader il bal sur il gol ora, aschia che las equipas van cul resultat da 0:1 ella pausa.
Dus penaltis per Landquart
La secunda mesadad entscheiva in tec meglier per Trun/Rabius. Entras Gianin Derungs ed Orlando Monn vegn l’equipa hospitonta tier bunas entochen fetg bunas caschuns da marcar, denton vegnan quellas buca nezegiadas. Landquart surpren silsuenter la bitgetta dil giug. In proverbi el ballapei di: tgi che fa buc ils gols survegn els. Suenter in bal liung ord la defensiun da Landquart sa Trun/Rabius mo sclarir tier in corner. Suenter quei corner nunnecessaria ed in schischuri avon gol da Trun/Rabius anfla il bal la via vid il maun d’in defensur da Trun. Il penalti dispiteivel ella 72avla minuta marca David Micevski cun tutta forza agl 1:1. Nov minutas pli tard retscheiva Landquart il secund penalti. Suenter che Trun/Rabius ha defendiu cun memia bia hectica, croda in attaccader a tiara ella zona da puniziun. Era quei penalti sietta David Micevski segir e porta en avantatg l’equipa da casa cun 2:1. Duront las davosas minutas dilg giug emprova Trun/Rabius d’egualisar la partida, denton senza succsess. Ella 90avla minuta siara Landquart il sac diltuttafatg. Suenter in sbagl da baghegiar si il giug vegn Marc Pirovino persuls avon il gol e marca il 3:1. Aschia va quella partida a fin cul resultat final da 3:1 en favur da Landquart.
Impedir sbagls individuals
Per Trun/Rabius ei quei ina terrada absolut buca neccessaria. Davon ei buca vegniu sittau gols e davos buca defendiu cun cumpleina concentraziun. L’equipa dalla Cadi sto sminuir ils sbagls individuals e mussar ina solida prestaziun sur 90 minutas. Trun/Rabius sto mussar ina reacziun sillas duas terradas questa primavera, autruisa vegn ei grev da mantener il contact tiel miez dalla tabella.
Sandro Orlik
3. ligia, gruppa 1
Landquart 1 – Trun/Rabius 3:1 (0:1)
Gols: 40. Patrizio Decurtins 0:1 (p), 72. David Micevski 1:1 (p), 81. David Micevski 3:1 (p), 90. Marc Pirovino 3:2.
Landquart: Fadri Dennler, Yaron Bless, Renato Oswald, Suad Gerzic, Men Hermle, Jetmir Hashani, Manuel Candrian, Simeon Raphael Eckert, Gian Huber, Marc Pirovino, David Micevski. Reservas: Sandro Hertner, Irvin Cutuk, Mate Lekishvili, Mirco Fausch, Christian Lampert, Shayi David Iwadi.
Trun Rabius: Livio Lozza, Elia Schmed, Damian Schmed, Mathias Flepp, Mirco Pfister, Rovin Schmed, Lucas Maissen, Orlando Monn, Nico Caduff, Patrizio Decurtins, Gianin Derungs. Reservas: Aurelio Carigiet, Matia Friberg, Enea Decurtins, Silvan Cajacob, Andri Carigiet.
Remarcas: Trun/Rabius senza Ramon Orlik, Denis Monn, Silvan Muoth, Sandro Orlik, Robin Monn (blessai), Lucas Seiler, Nic Culan Jacomet e Geo Cauzza (absents).
Gust da leger dapli?