Glion fa la quarta Primavera

Las fatschentas da Glion arvan lur portas la sonda proxima. 39 exposituras ed expositurs presentan lur products e prestaziuns el center dil marcau da Glion. L’exposiziun Primavera ha liug per la quarta gada. Franca Strasser, la presidenta dalla Uniun da commerci e mistregn da Glion e contuorn di che l’exposiziun da primavera d’uonn seigi aunc adina ina dallas sulettas exposiziuns sut tschiel aviert el Grischun.

parter

«Mintgaton drov’ei pli ditg entochen ch’enzatgei niev catta il sustegn dil publicum», di Franca Strasser, la presidenta dall’Uniun da commerci e mistregn da Glion e contuorn. «La Primavera ch’ei aunc adina ina dallas sulettas exposiziuns open air el Grischun ha stuiu siglir sur entgins obstachels per secumprovar.» L’emprema exposiziun hagi giu liug il 2021, agl ur dalla pandemia, raquenta Franca Strasser. Suenter la premiera hagien ils organisaturs stuiu dar plaid e fatg daco ch’ins fetschi uss ina exposiziun dad in di e desisti dalla ILHGA ch’eri secumprovada e che cuzzavi quater dis. «La Prima­vera ei negina alternativa per la ILHGA da pli baul», di la presidenta dallas 160 commerciantas e commerciants da Glion e conturn. «Perquei che negin da nossa uniun ha vuliu far pli la ILHGA cun ina gronda investiziun da temps e daners, havein nus ponderau, tgei alternativas ch’ei dess. Ed aschia ei la Primavera naschida.»

Vasta purschida

La presidenta dall’uniun da commerci e mistregn Franca Strasser dat ina survesta dil perimeter d’exposiziun el center dil marcau da Glion. Leusuenter ein autos e bikes dus temas impurtonts dalla Primavera da sonda proxima a Glion. Dalla partida ein siat garaschas che presentan lur novs models. Tgi che sefatschenta el mument cun novs products pigl iert e pil balcon vegn era sin siu quen cun visitar l’exposiziun dalla stizun-fier e da tenercasa Zinsli. Dalla partida ei era Expert Surselva che representa principalmein la branscha da radio, televisiun e telefonia mobila. Plinavon separticipeschan  las apotecas, drogarias, la papeteria Maggi, il Spital regiunal Surselva sco era La Naturo­pata. La fatschenta da famiglia Caveng festivescha siu 150avel onn d’existenza alla Primavera 2025. Las visitadras ed ils visitaders san era prender envesta dalla lavur dils pumpiers dad Ilanz/Glion ni era admirar il vehichel electric Terren che ha contonschiu igl onn 2023 il record mundial d’altezia per vehichels electrics el Chile.

Moda e program per affons

Tenor la broschura d’informaziun dalla Primavera dat ei ina exposiziun da moda speciala uonn. Presentada vegn la moda da secund maun dalla stiziun La Trucca che s’auda all’uniun da dunnas da Glion. Davart ils pli novs arranschaments da fluras survegn ins envesta tier las duas fatschentas da fluras Candinas e Calamandrin. E secapescha che era las visitadras ed ils visitaders pigns vegnan sin lur quen alla Primavera 2025. Quei cun giugar cugl excavatur ella sablunera surdimensiunada ni cun seschar smincar. Ultra da quei datti ina preit da reiver per cumprovar tgi che ha la megliera fuorma.

Communicaziun e dimensiuns per exponer

Sco quei che la presidenta dall’uniun da commerci e mistregn Franca Strasser di. emprovi il comite d’organisaziun era uonn da trer ina bilanza e lu conclusiuns ed optimaziuns per la proxima exposiziun. «Per la Primavera d’uonn havein nus creau in meglier flyer cun dapli informaziuns el stil da telegram. E lu havein nus era empruau d’optimar ils plazs d’exposiziun, aschia che mintga expositura ed expositur ha plazza avunda era per retscheiver il publicum.»

L’exposiziun Primavera ha liug a Glion sonda, ils 12 d’avrel 2025 naven dallas 10.00 – 17.00.