Il tip – ir a Vienna per 50 francs
Sgular fa donn al clima. Mintgin che sa lez. Blers s’empipan e sgolan tuttina. Era pliras da mias collegas. «Jau giess gugent cun tren, ma igl è uschè char», m’ha ina dad ellas ditg tschel di. Immediat hai jau tramess ad ella il link da «thetrainline.com». Sin questa plattafurma pon ins cumprar bigliets favuraivels. Dapi ch’jau enconusch la plattafurma, na lasch jau betg pli valair che ir cun tren saja pli char che sgular.
Jau vom per exempel gugent ina giada l’onn a Vienna e chat adina colliaziuns da Buchs fin Vienna che custan 40 francs per in viadi. Sche jau vi exnum ir emprima classa, custa la colliaziun halt 10 francs dapli. Per 50 francs na pon ins en mintga cas betg sgular first class a Vienna. Vus avais dubis? U forsa betg plaschair da Vienna? Vus pudais era viagiar cun tren da Turitg a Paris u da Turitg a Hamburg. Vus chattais colliaziuns directas per 50 u 60 francs.
Mes tip per mias collegas ed insumma per ina e scadin è perquai: Avant che sgular dai svelt in tgit sin «thetrainline.com», forsa è ir cun tren gea pli favuraivel che sgular. En mintga cas èsi main nuschaivel per il clima.
Di per di dat ina redactura u in redactur da la FMR in tip a lecturas e lecturs – in cussegl u ina recumandaziun, senza impegn e senza garanzia che quel «tip» plaschia alura a tuttas e tuts.
Gust da leger dapli?