Tgazas: Excursiùn guidada segl Bot da Cresta
La sonda digls 26 d’avregl, da las 9.30 antoca las 11.00, â liac egn’excursiùn guidada segl Bot Cresta par prender investa a la culegna digl Tains da Brùnz c’existeva là davent digls 2300 antoc’igls 800 avànt Cristus. Igls colonist digls ezs tains vevan biagieu lur vitg an egna fessa digl taragn da que crest. Els vivevan betga me da l’agricultura, mobagn ear da la producziùn da vascheala d’arscheglia c’i fagevan an grànds diembers.
Igl vitg da Savusch
Agls visitaders vignan mussos igls fastezs ànc vasevels digls stgavamaints archeologics fatgs trànter igls 1942 a 1970. Ànc avànt declara igl guid, Herbert Patt, noua c’igl vitg da Savusch satgata a tge muntada ca que num â. Alura mussa’l, tge c’igl Fràncs ân radetg a nus, cur c’i vevan sutamess que antschies anturn igls 800. Igl vean ear raquinto, noua ca la fabrica da pon Lochmühle steva igls 19avel tschantaner a ple tard la fabrica da cuvreias da làna Schauenberg ca fageva talas pigl militer a par las casadas privatas. I vean ear musso igls divers uals ca s’uneschan a Summaprada par sbucar agl Ragn posteriur. A caschùn da quella curta spassageada vean ign ear a saver, tge c’igl selvicultur zirquital Wallo Burkhard a l’autura Ina Murbach-Wende a Petra Plüss â da far cugl Bot la Cresta. L’excursiùn vean concludida cun infurmaziùns davart igl Rets ad igl Kelts.
Ign s’antopa a las 8.30 a Schauenberg, a la bavurtga par rivar sen la Mantogna Davains. Igl vean racumondo bùns calzers. Par la guidada en admessas maximalmeing 12 dels. (fmr/bt)
Gust da leger dapli?