Festivar la veta – cun sonoritad

Quest’jamna ei il chor «Jugendchor beider Basel» a Breil. Gl’ensemble da giuventetgna d’omisdus mez-cantuns da Basilea exercitescha il program da siu concert ch’ei ils 23 e 24 da matg ella Voltahalle a Basilea. Ussa vendergis presentan els quel l’emprema gada a Glion.

parter

«Uonn essan nus ina gruppa plitost pintga. Mo quei ei buca gl’essenzial», remarca Tim Waldmeier. El e Julia Baumgartner meinan quest’jamna in camp da cantar a Breil. L’emprova ella sala dalla Casa Albin entscheiva mintga damaun allas 9.15 – sco usitau cun exercezis da sluccar e cantar en. «Quels exercezis ei buca mo impurtonts per sluccar il tgierp e las cordas vocalas», declara Julia Baumgartner. Ella ei co-menadra dil camp. Siu partenari, Tim Waldmeier, aschunta: «Quell’introducziun ei essenziala per rimnar l’attenziun e per formar l’unitad». Omisdus han aunc buca vargau 30 onns ed ein dirigents professiunals. Alla Scol’aulta da musica a Basilea han els studegiau ensemen e finiu la stad 2022 lur scolaziun cul master en direcziun da chor.

Ina passiun communabla

Duront lur temps da studi han Timo Waldmeier e Julia Baumgartner fundau, ensemen cul dirigent, cumponist e pianist Jürg Siegrist da Muttenz, in chor da giuventetgna. Il «Jugendchor beider Basel» ha retschiert sustegn dall’Uniun da chors d’omisdus cantuns Basilea e dall’Uniun svizra da chors. Dapi siat onns s’etablescha quel cun ina purschida da qualitad. «Gie, ei constat, quels che s’annunzian pils projects ein fetg motivai», declara Julia Baumgartner. Ella e Timo Waldmeier sebrattan enten menar ils exercezis dil project 2025. «Nus essan surstai con spert ch’els emprendan il program», remarcan omisdus. Cun «els» manegian ils dus dirigents las otg sopranistas, las siat altistas, ils treis tenors ed ils tschun bass.

Las participontas ed ils participonts ein da casa els dus mezs-cantuns da Basilea, tuts han ina passiun communabla: cantar, far musica cull’atgna vusch. Ellas ed els ein buca commembers dil «Jugendchor beider Basel», mobein separticipeschan al project annual cul concert. Quel d’uonn ei planisaus ils 23 e 24 da matg 2025 silla tribuna dalla Voltahalle.

Endisch emprovas per 13 canzuns

L’jamna avon Pastgas ei la gruppa s’entupada a Basilea per instradar il project cul tetel «fyyre». Cantaduras e cantadurs han s’empriu d’enconuscher, culs co-dirigents han els legiu l’emprema gada las partituras e fuffergnau el  Il motto ei dedicaus al festivar la veta en tut sias facettas. Uonn ein 23 dunnas ed umens giuvens da 18 tochen 25 onns s’annunziai da preparar cun Julia Baumgartner e Timo Waldmeier il concert. Duront la viseta ella sala dalla Casa Albin a Breil han els schau mirar ellas notas e tedlar las canzuns. Per emprender las 13 canzuns dat ei endisch emprovas repartidas sils tschun gis a Breil. Il chor empren ton ovras dalla literatura cumprovada sco era ovras che seconfruntan cull’estetica da tuns actuala. Il program «fyyre» ei multifars ed includa canzuns da divers lungatgs, culturas e temps. Duront la viseta all’emprova ha il chor schau resunar in «Cantate Domino» da Claudio Monteverdi (1567-1643) en sis vuschs, lu «Für immer uf di» da Patent Ochsner e «Meiteli, wenn du witt go tanze», la canzun populara arranschada da Susanne Würmli. Aunc diesch autras canzuns exercitescha il «Jugendchor beider Basel» per la premiera da concert a Glion.


Il concert en Surselva dil «Jugendchor beider Basel» ei venderdis, ils 25 d’avrel 2025, allas 19.00, ella baselgia catolia. L’entrada ei libra. L’uniun «a Glion» sustegn l’organisaziun dil concert.